१० असार २०८३, बुधबार १४:४५ – Nagarikabhiyan : National News

​देवानगञ्ज १मा रहेकाे मरिया खोला पुल निर्माणका लागि प्रदेश सरकारद्वारा डेढ करोड विनियोजन: मन्त्री मेहता

​​देवानगञ्ज । कोशी प्रदेश सरकारका सामाजिक विकास मन्त्री रामप्रसाद मेहताले देवानगञ्ज गाउँपालिका वडा नम्बर १ मा रहेको मरिया खोलामा पुल निर्माणका लागि प्रदेश सरकारले डेढ करोड (१ करोड ५० लाख) रुपैयाँ विनियोजन गरेको जानकारी दिनुभएको छ।
​
देवानगञ्ज गाउँपालिकाको गाउँसभामा प्रमुख अतिथिको रूपमा सम्बोधन गर्दै मन्त्री मेहताले उक्त कुराको जानकारी गराउनुभएको हो। गाउँसभालाई सम्बोधन गर्ने क्रममा उहाँले स्थानीय नागरिकको सहज आवतजावत र विकासको पूर्वाधारलाई प्राथमिकतामा राख्दै प्रदेश सरकारले यो बजेट छुट्याएको बताउनुभयो।
​
मरिया खोलामा पुल नहुँदा स्थानीय बासिन्दाले वर्षायाममा भोग्दै आएका समस्यालाई मध्यनजर गर्दै यो योजना अगाडि सारिएको उहाँको भनाइ थियो। पुल निर्माणको सुरुवातसँगै देवानगञ्ज क्षेत्रको यातायात र आर्थिक गतिविधिमा ठूलो टेवा पुग्ने विश्वास व्यक्त गरिएको छ।

देवानगञ्ज गाउँपालिकाले सिँचाई विद्युत महसुल पूर्ण रूपमा निःशुल्क गर्ने

​देवानगञ्ज । सुनसरीको देवानगञ्ज गाउँपालिकाले स्थानीय कृषकहरूका लागि एउटा ठुलो र राहतमूलक घोषणा गरेको छ। गाउँपालिकाले आगामी नयाँ आर्थिक वर्षको नीति तथा कार्यक्रममार्फत कृषि सिँचाईका लागि संचालन गरिने विद्युतीकरण कार्यक्रम पश्चात् किसानहरूलाई विद्युतीय महसुल पूर्ण रूपमा निःशुल्क गर्ने नीति सार्वजनिक गरेको हो।
​
गाउँपालिकाको हालै सम्पन्न २१ औँ गाउँ सभालाई सम्बोधन गर्दै गाउँपालिका अध्यक्ष बेचन प्रसाद मेहताले यस ऐतिहासिक योजनाबारे आधिकारिक जानकारी दिनुभएको हो।
​
गाउँ सभामा नीति तथा कार्यक्रम प्रस्तुत गर्दै अध्यक्ष मेहताले देवानगञ्जका अधिकांश नागरिक कृषिमा आश्रित रहेकाले कृषि क्षेत्रको आधुनिकीकरण, लागत न्यूनीकरण र उत्पादकत्व वृद्धिका लागि यो योजना ल्याइएको बताउनुभयो।
​
“सिँचाईको अभाव र महँगो इन्धनका कारण किसानहरूले भोग्नुपरिरहेको सास्तीलाई अन्त्य गर्न हामी प्रतिबद्ध छौँ। पहिलो चरणमा सिँचाई विद्युतीकरणलाई तीव्रता दिइनेछ र त्यसलगत्तै किसानहरूले सिँचाई गर्दा लाग्ने सम्पूर्ण बिजुली महसुल गाउँपालिकाले नै बेहोर्नेछ,” अध्यक्ष मेहताले दाबी गर्नुभयो।

देवानगञ्जमा समुदायमा सरकारी वकील तथा कानूनी सचेतना कार्यक्रम सम्पन्न

देवानगञ्ज । सुनसरीको देवानगञ्ज गाउँपालिकामा ‘समुदायमा सरकारी वकील तथा कानूनी सचेतना कार्यक्रम’ सम्पन्न भएको छ । जिल्ला सरकारी वकील कार्यालय, इनरुवा, सुनसरीको आयोजनामा सो सचेतना कार्यक्रम सञ्चालन गरिएको हो ।
​
सर्वसाधारण नागरिकलाई कानूनी व्यवस्था, सरकारी वकीलको भूमिका र आफ्ना अधिकार तथा कर्तव्यका बारेमा सुसूचित गराउने उद्देश्यले गाउँपालिकाको सभाहलमा उक्त कार्यक्रम आयोजना गरिएको थियो ।
​
कार्यक्रममा प्रमुख अतिथिको रूपमा बोल्दै देवानगञ्ज गाउँपालिकाका अध्यक्ष बेचन प्रसाद मेहताले स्थानीय तहमा कानूनी साक्षरताको निकै आवश्यकता रहेको औंल्याउनुभयो । मन्तव्यका क्रममा अध्यक्ष मेहताले भन्नुभयो गाउँघरमा अझै पनि धेरै नागरिकहरू कानूनी ज्ञानको अभावमा अन्याय सहनुपर्ने वा सानातिना विवादमा ठूलो समस्यामा फस्ने गरेका छन् । यस्ता सचेतना कार्यक्रमले आम नागरिकलाई आफ्ना हक-अधिकार बुझ्न र अपराध नियन्त्रणमा सहयोग पुर्‍याउँछ । समाजलाई न्यायपूर्ण र भयरहित बनाउन कानूनी ज्ञान अनिवार्य छ । आगामी दिनमा पनि गाउँपालिकाले यस्ता जनचेतनामूलक अभियानहरूलाई वडा तहसम्मै पुर्‍याउन पूर्ण सहयोग र समन्वय गर्नेछ ।
​
कार्यक्रममा जिल्ला सरकारी वकील कार्यालयका प्रतिनिधिहरूले सरकारी वकीलले गर्ने काम, कानूनी उपचार पाउने प्रक्रिया र समाजमा घट्ने विभिन्न प्रकृतिका अपराध एवं सजायका व्यवस्थाहरूबारे सहभागीहरूलाई जानकारी गराउनुभएको थियो ।

देवानगञ्जमा वर्षौंदेखिको हिलाम्मे बाटो कालोपत्रे हुँदै: स्थानीयमा छायो खुसी

देवानगञ्ज ।देवानगञ्ज गाउँपालिका वडा नम्बर ६ र ७ जोड्ने हकपार जाने बाटोको मुहार फेरिने भएको छ। विगत लामो समयदेखि सामान्य वर्षामा पनि हिलाम्मे भएर सर्वसाधारणलाई आवतजावतमा सास्ती दिँदै आएको उक्त सडक खण्ड कालोपत्रे (पिच) हुन लागेपछि स्थानीय बासिन्दाहरू निकै उत्साहित भएका छन्। सडक स्तरोन्नति योजना अन्तर्गत हाल पहिलो चरणको ग्याभेल (ग्राभेल) राख्ने कार्य सम्पन्न भइसकेको छ।

​यसैबीच आज (बिहीबार) देवानगञ्ज गाउँपालिकाका अध्यक्ष बेचन प्रसाद मेहताले निर्माण कार्यको स्थलगत अनुगमन गर्नुभएको छ। अनुगमनका क्रममा अध्यक्ष मेहताले सडकको गुणस्तर चुस्त राख्न निर्देशन दिँदै स्थानीय बासिन्दाहरूसँग प्रत्यक्ष संवाद समेत गर्नुभयो।
​स्थानीयसँगको संवादका क्रममा अध्यक्ष मेहताले गाउँपालिकाभित्रका मुख्य तथा सहायक सडकहरूलाई बाह्रै महिना चल्ने बनाउने प्रतिबद्धता जनाउँदै विकास निर्माणमा स्थानीयको रचनात्मक सहयोग र निगरानी आवश्यक रहेको बताउनुभयो।

​”पहिले हिउँदमा धुलो र वर्षामा हिलोले गर्दा यो बाटो हिँड्नै नसकिने हुन्थ्यो। अहिले ग्याभेलको काम सकिएर कालोपत्रेको तयारी हुँदा र गाउँपालिका अध्यक्ष आफैंले चासो देखाएर अनुगमन गर्दा काम समयमै सकिनेमा हामी ढुक्क छौँ।”
​यो सडक पिच भएपछि वडा नं. ६ र ७ का हजारौँ स्थानीयको दैनिक आवतजावत सहज हुनुका साथै कृषि उपजलाई बजारसम्म पुर्‍याउन र आपत्कालीन स्वास्थ्य सेवाको पहुँचमा ठुलो मद्दत पुग्ने विश्वास गरिएको छ।

‘खुसी किसान, देवानगञ्जको पहिचान’ नारा साकार पार्दै गाउँपालिकाः ट्रान्सफर्मर खरिद अन्तिम चरणमा

​देवानगञ्ज । ‘खुसी किसान, देवानगञ्जको पहिचान’ भन्ने मूल संकल्पका साथ सुनसरीको देवानगञ्ज गाउँपालिकामा सञ्चालित कृषि विद्युतीकरण आयोजनाले गति लिएको छ। गाउँपालिकाका किसानहरूलाई सिँचाइमा आत्मनिर्भर बनाई उत्पादन बढाउने उद्देश्यले सुरु गरिएको यस बृहत् योजनाको काम अहिले अन्तिम चरणमा पुगेको छ।
​यसैक्रममा, आयोजनाको मुख्य कडी मानिएको ट्रान्सफर्मर खरिद प्रक्रिया अन्तिम चरणमा पुगेको छ भने पहिलो चरण अन्तर्गत बाँकी रहेका प्राविधिक तथा भौतिक पूर्वाधारका कामहरूलाई अहिले द्रुत गति (युद्धस्तर) मा अगाडि बढाइएको छ।
​हालै गाउँपालिकाका अध्यक्ष बेचन प्रसाद मेहताको नेतृत्वमा जनप्रतिनिधि, कर्मचारी र प्राविधिक टोलीले विभिन्न वडाहरूमा पुगेर आयोजनाको स्थलगत अनुगमन तथा निरीक्षण समेत गरेको छ।
​
​विद्युतीकरणको कामलाई पूर्णता दिन गाउँपालिकाले प्रशासनिक र प्राविधिक तयारीलाई तीव्रता दिएको छ। अनुगमनका क्रममा देखिएका र पहिलो चरणमा छुट्न पुगेका सानातिना प्राविधिक कामहरूलाई अहिले द्रुत गतिमा फत्ते गरिँदैछ।
​खरिद प्रक्रिया अन्तिम चरणमा: आवश्यक क्षमताका ट्रान्सफर्मर खरिदको कानुनी तथा आर्थिक प्रक्रिया अन्तिम चरणमा पुगेको र आगामी केही दिनभित्रै सामग्री गाउँपालिकामा आइपुग्ने जनाइएको छ।

ट्रान्सफर्मर उपलब्ध हुनासाथ प्राविधिक टोलीले तोकिएका स्थानहरूमा जडानको काम तत्कालै सुरु गर्ने तयारी गरेको छ।
​पहिलो चरणको काममा तीव्रता: जहाँ-जहाँ पोल गाड्ने, तार तान्ने वा स्टे राख्ने काम बाँकी थिए, ती क्षेत्रमा अतिरिक्त जनशक्ति परिचालन गरेर कामलाई गति दिइएको छ।

​स्थलगत निरीक्षणका क्रममा निर्माण व्यवसायी र प्राविधिकहरूलाई समयमै र गुणस्तरीय काम सक्न निर्देशन दिँदै गाउँपालिका अध्यक्ष बेचन प्रसाद मेहताले भन्नुभयो “देवानगञ्जको पहिचान र आर्थिक मेरुदण्ड नै कृषि हो। हाम्रा किसान दाजुभाइले हिउँद-बर्खा सधैँ सिँचाइको समस्या झेल्नुपर्ने र महँगो डिजेल खरिद गरेर खेती गर्नुपर्ने बाध्यतालाई सधैँका लागि अन्त्य गर्न हामी लागिपरेका छौँ। ट्रान्सफर्मर खरिदको काम अन्तिम चरणमा छ, केही दिनमै यसको जडान सुरु हुनेछ। पहिलो चरणको बाँकी काम पनि अहिले द्रुत गतिमा भइरहेको छ। चाँडै नै किसानका खेतखेतमा बिजुली पुर्‍याएर यो योजना मुलुककै नमुना बनाउने हाम्रो लक्ष्य छ।”
​

​लामो समयदेखि आकाशे पानी र महँगो पम्पसेटको भरमा खेती गर्दै आएका देवानगञ्जका स्थानीय किसानहरू खेतमै बिजुली पुग्न लागेपछि निकै हर्षित भएका छन्।

देवानगञ्जमा कोशी प्रदेश सरकारको बजेटबाट ट्युवेल वितरण गर्ने: सकारात्मक कार्यमा पनि सामाजिक सञ्जालमा बद्नाम गर्ने प्रयास !

देवानगञ्ज । काेशि प्रदेश सरकारको स्वीकृत कार्यक्रम अन्तर्गत सुनसरीको देवानगञ्ज गाउँपालिकाका विपन्न नागरिकहरूका लागि ट्युवेल (ट्युबवेल) वितरण कार्य अगाडि बढाइएको छ। शुद्ध खानेपानीको पहुँचबाट टाढा रहेका अति विपन्न, दलित तथा पिछडिएका परिवारहरूलाई लक्षित गरी सुरु गरिएको यस कार्यक्रमबाट स्थानीय सर्वसाधारण निकै उत्साहित भएका छन्।
​तर, पालिकाभित्रका गरिब जनताले राहत पाउने यस्तो जनहितकारी कार्यलाई समेत केही व्यक्ति र समूहले राजनीतिक रंग दिँदै सामाजिक सञ्जालमा गाउँपालिकाको बद्नाम गर्ने र भ्रम फैलाउने प्रयास गरिरहेका छन्।
​
यो कार्यक्रम कोशी प्रदेश सरकारको विशेष बजेट र स्वीकृत योजना अन्तर्गत गाउँपालिकाको प्रत्यक्ष समन्वयमा सञ्चालन भइरहेको हो। स्थानीय प्रशासन र जनप्रतिनिधिहरूको रोहबरमा वास्तविक विपन्न परिवारहरूको पहिचान गरी न्यायोचित ढंगले ट्युवेल वितरण प्रक्रिया अगाडि बढाइएको पालिका स्रोतको दाबी छ।
​
तर, पछिल्लो केही दिनदेखि सामाजिक सञ्जाल (फेसबुक) मा केही व्यक्तिहरूले वितरण प्रक्रिया र लक्षित वर्गको छनोटलाई लिएर अतिरञ्जित टिप्पणी गर्दै गाउँपालिका प्रशासन र जनप्रतिनिधिहरूमाथि राजनीतिक पूर्वाग्रह राखेर प्रहार गरिरहेका छन्। विकास र सेवामुलक कार्यलाई समेत विवादमा तानी पालिकाको छवि धमिल्याउने नियत सामाजिक सञ्जालका पोस्टहरूमा स्पष्ट देखिन्छ।
​
यस विषयमा देवानगञ्ज गाउँपालिकाका स्थानीय बुद्धिजीवी र सरोकारवालाहरूले भने विकासका काममा राजनीति हुनु दुःखद भएको बताएका छन्। “विपन्न नागरिकको घरमा खानेपानी पुग्नु र उनीहरूले राज्यबाट राहत पाउनु खुसीको कुरा हो, एक स्थानीयले भने, प्रक्रियागत रूपमा भएका काममा केही कमीकमजोरी भए सल्लाह-सुझाव दिने ठाउँ हुन्छ, तर पालिकालाई नै बद्नाम गर्ने गरी सामाजिक सञ्जालमा भ्रम फैलाउनु राजनीतिक प्रतिशोध मात्र हो।
​
गाउँपालिकाका प्रतिनिधिहरूका अनुसार वास्तविक गरिब र विपन्न
परिवारसम्म सरकारी राहत पुगोस् भन्ने कुरामा पालिका पूर्ण पारदर्शी र प्रतिबद्ध छ। सामाजिक सञ्जालमा आउने नकारात्मक र भ्रामक टिप्पणीहरूको पछि नलाग्न र सत्यतथ्य बुझ्न पालिकाले सर्वसाधारणमा अनुरोध समेत गरेको छ।
​
जिल्लाकै ग्रामीण र पिछडिएको क्षेत्र मानिने देवानगञ्जमा यसरी जनताले सिधै लाभ पाउने कार्यक्रम आउनु सकारात्मक भए तापनि, फेसबुक जस्ता सञ्जालमा हुने यस्ता नकारात्मक प्रचारबाजीले वास्तविक सेवाग्राहीमा अन्यौल पैदा गर्ने खतरा बढेको छ।

४२ वर्षे लामो शैक्षिक यात्राबाट प्रअ गाया प्रसाद भगतको सुखद बिदाइ

देवानगञ्ज । सुनसरीको देवानगञ्ज गाउँपालिका–६, राजगञ्ज सिनुवारीस्थित श्री जनता आधारभूत विद्यालयका प्रधानाध्यापक श्री गाया प्रसाद भगत अनिवार्य अवकाश हुनुभएको छ। उहाँको ४२ वर्ष लामो गौरवमय शैक्षिक सेवाकाल पूरा भएको अवसरमा विद्यालय प्राङ्गणमा एक भव्य सम्मान तथा बिदाइ कार्यक्रमको आयोजना गरियो।
​उक्त बिदाइ कार्यक्रममा देवानगञ्ज गाउँपालिकाका अध्यक्ष बेचन प्रसाद मेहता, वडा नं. ६ का वडा अध्यक्ष हरिनन्दन मेहता, वडा सदस्य परशुराम यादव, स्थानीय शिक्षाप्रेमी, शिक्षक, विद्यार्थी तथा अभिभावकहरूको उपस्थिति रहेको थियो।
​विद्यालयको विकासमा अतुलनीय योगदान
​
कार्यक्रमका प्रमुख अतिथि एवं देवानगञ्ज गाउँपालिकाका अध्यक्ष बेचन प्रसाद मेहताले प्रअ भगतको योगदानको उच्च प्रशंसा गर्नुभयो। उहाँले भन्नुभयो गाया प्रसाद सरले आफ्नो जीवनको ऊर्जावान् ४२ वर्ष शिक्षा क्षेत्रमा सुम्पेर यो क्षेत्रमा ठुलो गुन लगाउनुभएको छ। विद्यालयको शैक्षिक, प्रशासनिक तथा समग्र विकासमा उहाँले खेल्नुभएको भूमिका अतुलनीय छ। उहाँको अवकाशले विद्यालयलाई एउटा अभिभावकको अभाव महसुस गराउनेछ, तर उहाँको मार्गदर्शन आगामी दिनमा पनि पालिकाको शिक्षा नीति सुधार्न उपयोगी हुनेछ।

​त्यस्तै कार्यक्रमकाे सभापति र वडा नं. ६ का वडा अध्यक्ष हरिनन्दन मेहताले प्रअ भगतको निष्ठा र कर्मशीलताको चर्चा गर्दै भन्नुभयो ४२ वर्षसम्म एउटै क्षेत्रमा अटुट रूपमा सेवा गर्नु चानचुने कुरा होइन। उहाँको समर्पणले धेरै विद्यार्थी, शिक्षक र अभिभावकहरूलाई प्रेरणा दिएको छ। वडा र विद्यालयको तर्फबाट म उहाँप्रति हार्दिक कृतज्ञता व्यक्त गर्दछु।
​
कार्यक्रममा वडा सदस्य परशुराम यादवले पनि प्रअ भगतको सरल व्यक्तित्व र विद्यालय प्रतिको लगावले गर्दा नै आज यस विद्यालयले यो उचाइ लिन सकेको बताउँदै उहाँको योगदान सधैँ स्मरणीय रहने उल्लेख गर्नुभयो।
​
​कार्यक्रममा अवकाशप्राप्त प्रअ भगतलाई भावपूर्ण वातावरणका बीच गाउँपालिका अध्यक्ष, वडा अध्यक्ष लगायतका अतिथिहरूले दोसल्ला ओढाएर तथा कदरपत्र हस्तान्तरण गर्दै सम्मानसहित बिदाइ गर्नुभएको थियो। सो अवसरमा सहभागी शिक्षक तथा विद्यार्थीहरू उहाँको बिदाइमा भावुक बनेका थिए।
​
बिदाइ कार्यक्रमको समापनमा उपस्थित सम्पूर्ण महानुभावहरूले उहाँको आगामी अवकाशपछिको जीवन सुख, शान्ति, सुस्वास्थ्य, दीर्घायु रहोस् र आगामी दिनमा पनि समाजका लागि उहाँको योगदान निरन्तर रहिरहोस् भन्दै हार्दिक मंगलमय शुभकामना व्यक्त गरेका थिए।

देवानगञ्जमा माटो शिविर तथा बाली उपचार कार्यक्रम सम्पन्न

देवानगञ्ज । सुनसरीकाे देवानगञ्ज गाउँपालिकामा एक दिने माटो शिविर तथा बाली उपचार कार्यक्रम सफलतापूर्वक सम्पन्न भएको छ। कृषि ज्ञान केन्द्रको आयोजना र देवानगञ्ज गाउँपालिका कृषि शाखाको समन्वयमा उक्त कार्यक्रम सञ्चालन गरिएको हो।
​स्थानीय किसानहरूलाई आफ्नो खेतको माटोको स्वास्थ्य अवस्था बुझ्न र बालीनालीमा लाग्ने रोगव्याधिको पहिचान गरी नियन्त्रणका उपायहरू सिकाउने उद्देश्यले यो शिविर आयोजना गरिएको हो।
​शिविरमा स्थानीय किसानहरूले आफ्नो खेतबाट संकलन गरेर ल्याएका माटोका नमूनारूको नि:शुल्क परीक्षण गरिएको थियो। माटोमा रहेको अम्लीयपन, क्षारियपन र मुख्य पोषक तत्वहरूको अवस्था जाँच गरी विशेषज्ञहरूले सुधारका लागि उपयुक्त सुझाव र सिफारिस समेत दिएका थिए। यसैगरी, बाली उपचार शिविर अन्तर्गत किसानहरूले रोग र किराले सताएका विभिन्न बालीनालीका नमूनाहरू प्राविधिक टोलीलाई देखाएर तत्कालै समाधानका उपाय र परामर्श प्राप्त गरे।
​कार्यक्रमका प्रमुख अतिथि एवं देवानगञ्ज गाउँपालिकाका अध्यक्ष बेचन प्रसाद मेहताले गाउँपालिकाको मुख्य आधार नै कृषि भएकाले किसानको समस्या समाधान गर्न स्थानीय सरकार सधैं तत्पर रहने बताउनुभयो।

​गाउँपालिका अध्यक्ष बेचन प्रसाद मेहताले भन्नुभयो:
हाम्रो देवानगञ्जका अधिकांश नागरिक कृषिमै निर्भर हुनुहुन्छ। परम्परागत खेती प्रणालीले मात्र अब किसानको आर्थिक अवस्था सुध्रिन सक्दैन। माटोको स्वास्थ्य नबुझी जथाभावी मल प्रयोग गर्दा एकातिर लगानी खेर गइरहेको छ भने अर्कोतिर माटोको उर्वराशक्ति बिग्रिँदै गएको छ। यो शिविरले किसानहरूलाई आफ्नो माटो र बालीको समस्या बुझ्न ठूलो मद्दत पुर्‍याएको छ। आगामी दिनमा गाउँपालिकाका सबै वडाका किसानको पहुँच पुग्ने गरी यस्ता प्राविधिक शिविरहरूलाई हामी थप विस्तार गर्दै लैजानेछौँ।”
​
शिविरमा सहभागी स्थानीय किसानहरूले पनि गाउँघरमै विशेषज्ञ टोली आएर माटो परीक्षण र बालीको उपचार विधि सिकाइदिएकोमा खुसी व्यक्त गरेका थिए।
​
कार्यक्रममा कृषि ज्ञान केन्द्रका प्रतिनिधि, गाउँपालिकाका जनप्रतिनिधि, कृषि शाखाका कर्मचारी र स्थानीय किसानहरूको उत्साहजनक उपस्थिति रहेको थियो।

​मेरिल्याण्ड कलेजमा ८ सय बढी विद्यार्थीको भव्य अभिमुखीकरण, उत्कृष्ट विद्यार्थीहरू सम्मानित

​विराटनगर । कोशी प्रदेशको राजधानी विराटनगरमा विगत २४ वर्षदेखि गुणस्तरीय शिक्षा प्रदान गर्दै आएको मेरिल्याण्ड कलेजले कक्षा ११ का नवआगन्तुक विद्यार्थीहरूका लागि एक भव्य अभिमुखीकरण कार्यक्रम सम्पन्न गरेको छ। कलेजले बिहीबार आयोजना गरेको विशेष समारोहमा विज्ञान र व्यवस्थापन संकाय तर्फ कक्षा ११ मा नयाँ भर्ना भएका ८ सय भन्दा बढी विद्यार्थीहरूलाई स्वागत तथा अभिमुखीकरण प्रदान गरिएको हो।
​शैक्षणिक र अतिरिक्त क्रियाकलापमा प्रोत्साहन गर्ने उद्देश्यका साथ कलेजले कार्यक्रमको अवसरमा आफ्ना उत्कृष्ट ५० जना विद्यार्थीहरूलाई विशेष सम्मान गरेको थियो। त्यसैगरी, विज्ञान तथा व्यवस्थापन संकाय तर्फको कक्षा ११ को प्रवेश परीक्षा मा सर्वोत्कृष्ट अङ्क ल्याएर भर्ना भएका ५ जना विद्यार्थीहरूलाई पनि कलेजले विशेष रूपमा पुरस्कृत तथा सम्मानित गरेको छ।
​कार्यक्रममा विराटनगर महानगरपालिका शैक्षिक प्रशासन महाशाखा प्रमुख राम ढुङ्गेल प्रमुख अतिथिको रूपमा उपस्थित हुनुहुन्थ्यो भने विशिष्ट अतिथिको रूपमा चर्चित हास्य कलाकार एवं ‘कॉमेडी किङ अफ नेपाल’ मनोज गजुरेलको उपस्थिति रहेको थियो।
​
कलेजका अध्यक्ष गुणराज ढुङ्गेलको अध्यक्षतामा सम्पन्न उक्त कार्यक्रममा उपाध्यक्ष डा. पि. के. झा, प्रिन्सिपल लक्ष्मण ढकाल, निर्देशकहरू भेषराज पोखरेल, प्रदिपकुमार भगत, डा. मनोज गुप्ता, नन्दकिशोर अग्रवाल, डा. शिवनारायण यादव, पेशल पोखरेल र जयराज राजवंशी लगायतले विद्यार्थीहरूलाई खादा ओढाएर उज्ज्वल भविष्यको कामना सहित सम्मान गर्नुभएको थियो।