३० फाल्गुन २०७८, सोमबार १५:५२ – Page 5 – Nagarikabhiyan : National News

पार्टी एकता गरिएपछि फेला परेको ‘भिलेन’सँग लड्नुपर्‍यो : प्रचण्ड

धनगडी ।  नेकपा माओवादी केन्द्र अध्यक्ष पुष्पकमल दाहाल प्रचण्डले एमालेसँग पार्टी एकता गरेर नेकपा गठन गर्नु गलत नरहेको प्रस्टीकरण दिएका छन् ।

धनगडीमा सोमबार प्रदेशस्तरीय प्रशिक्षण कार्यक्रमलाई सम्बोधन गर्दै अध्यक्ष प्रचण्डले एमालेसँग पार्टी एकता गरेर नेकपा गठन गर्नु गलत नरहेको भए पनि ‘भिलेन’ फेला पर्दा विभाजित हुनुपरेको बताए । ‘गठबन्धन गरेर पार्टी एकता गरौँ । पार्टी एकता गर्नु गलत थिएन’, प्रचण्डले भने, ‘तर, भिलेन फेला पर्‍यो । भिलेनसँग लड्दालड्दै विभाजित हुनुपर्‍यो ।’

एमालेसँग पार्टी एकता गरेर नेकपा गठन भएपछि षड्यन्त्र भएको आरोप लगाएका उनले माओवादीबाट आएका नेताहरूमाथि विभिन्न आरोप लगाएको बताए । ‘पार्टी एकता गरेपछि हामीमाथि षड्यन्त्र हुनथाल्यो । माओवादीबाट आएका नेतालाई आरोपित गरियो,’ प्रशिक्षण कार्यक्रममा प्रचण्डले भने ।

प्रधानमन्त्री देउवालाई रावलको जवाफ- तपाईकै ‘दिमाग खुस्केर’ होस हराएको हुनुपर्छ

काठमाडौं । नेकपा एमालेका नेता भीम रावलले प्रधानमन्त्री शेरबहादुर देउवाले आफूमाथि दिएको अभिव्यक्तिमा सत्यता नभएको दाबी गरेका छन्।सोमबार नुवाकोटको किस्पाङ गाउँपालिकाको प्रशासनिक भवनको उद्घाटन समारोहमा प्रधानमन्त्री देउवाले एमसीसीबारे रावलले दुई जिब्रे कुरा गरेको आरोपसमेत लगाएका थिए । रावल मन्त्री हुँदा एमसिसीको विरोध नगरेको तर अहिले विरोध गरेको देउवाको भनाई छ ।

‘उहाँ (भीम रावल) त्यसबेला मन्त्री हुनुहुन्थ्यो। उसबेला दिमाग खुस्किएको थियो ?’ देउवाले आक्रोशित हुँदै भनेका थिए । रावल रक्षामन्त्री छँदा मन्त्रिपरिषद्ले एमसीसीबारे महत्वपूर्ण निर्णय गरेको भन्दै प्रधानमन्त्री देउवाले झूठो कुरा नगर्न रावललाई चेतावनीसमेत दिएका छन्।

प्रधानमन्त्रीले आक्रोशपूर्ण अभिव्यक्ति दिएको केही समयमै रावलले ट्वीटबाट जवाफ दिँदै प्रधानमन्त्रीको भनाई उदण्डतापूर्ण र तथ्यहीन रहेको बताएका छन्। ‘सार्वजनिक जानकारी नराखी नराखी झुठा बोल्ने प्रधानमन्त्री या त आफ्नै दिमाग खुस्केर होस हराएको हुनुपर्छ या जनतामा भ्रम छरेर देशहितविरूद्धको कत्य छोप्ने कुत्सित चाल हुनुपर्छ’ रावलले भने । एमसीसीबारे अझै बहस गर्न तयार रहेको रावलले बताए ।

रुस-युक्रेन युद्धको ५ नतिजा के-के हुनसक्छ ?

काठमाडौँ । युद्धको कुहिरोमा अगाडिको बाटो हेर्न गाह्रो हुन सक्छ। रणभूमिबाट आउने समाचार, देश-देशको वाक् प्रचार, घरबारविहीन जनताको पीडा, यी सबैको कोलाहलले युद्धको समयमा हामीलाई घेरेको हुन्छ।

त्यसोभए केही समय रोकिएर हेरौं, राजनीतिज्ञ र सैन्य योजनाकारहरूले यो सम्पूर्ण संकटको के सम्भावित समाधानहरू सोचिरहेका छन् ? केही समाधानहरू बढी व्यावहारिक देखिन्छन् र केहीमा कम सम्भावना हुन्छ। यस विषय रुस र युक्रेन युद्धको मामिलामा मेल खान्छ । अब हेरौँ यस युद्धको पाँच नतिजा केके हुन सक्छन् त ?

युद्ध चाँडै समाप्त हुनेछ ?
यस सम्भावनामा रुसले आफ्नो आक्रमणलाई तीव्र पार्न सक्छ । जसले विनाशकारी परिणामहरू निम्त्याउन सक्छ। बम विष्फोट, मिसाइल आक्रमण र साइबर आक्रमणहरू कीभ वरिपरि बढ्न सक्छ। ऊर्जा, आपूर्ति र सञ्चारका च्यानलहरू काट्न सक्छ। हजारौं मानिसको ज्यान जान सक्छ।

यस्तो अवस्थामा पूर्ण बहादुरी देखाएर केही दिनमा कीभ रुसको नियन्त्रणमा आउन सक्छ । त्यहाँ रुसद्वारा नियन्त्रित कठपुतली सरकार गठन हुन सक्छ। युक्रेनका राष्ट्रपति जेलेन्स्की या त मारिन्छन् वा देशको पश्चिमी भागमा सर्छन् वा रुसको समर्थनमा सरकार गठन भएपछि उनी भाग्छन्।

यस्तो अवस्थामा राष्ट्रपति पुटिनले आफ्नो केही सेनालाई विजयी घोषणा गरेर फिर्ता लिन सक्छन् । यद्यपि, युक्रेनमाथि नियन्त्रण कायम गर्न केही सेनाहरू त्यहाँ छोड्न सक्छन्। युक्रेनबाट हजारौं मानिसहरूको पलायन जारी रहनेछ। र, युक्रेन बेलारुस जस्तै रुसको सहयोगी देश बन्छ।

यद्यपि, यो हुन असम्भव छैन तर यो धेरै अन्य परिस्थितिहरूमा निर्भर हुनेछ। र कठपुतली सरकार अस्थिर मात्र होइन, विद्रोहको सम्भावना पनि हुनेछ।

युद्ध लामो समयसम्म चल्नसक्छ 
यो लडाइँ लम्बिने सम्भावना पनि बढी छ । रूसी सेना ठुलो संख्यामा युक्रेनमा फसेको हुनसक्छ, सैनिकहरू निराश हुन सक्छन् र आपूर्तिमा समस्या हुनसक्छ।

रसियालाई किभ जस्ता शहरहरू कब्जा गर्न लामो समय लाग्न सक्छ किनकि डिफेन्डरहरू सडकस्तरमा लड्छन्। यो युद्ध सन् १९९० मा चेचन्याको राजधानी ग्रोज्नी कब्जा गर्न रुसले गरेको समय र क्रूर संघर्षको सम्झना हो। रुसले आफ्नो नियन्त्रणमा लिएका शहरहरूमा आफ्नो पकड कायम राख्न पनि संघर्ष गर्न सक्छ। समय बित्दै जाँदा युक्रेनी सेनाले व्यवस्थित र प्रभावकारी विद्रोह सुरु गर्नेछ।

रुसलाई यति ठूलो क्षेत्रमा सेना पठाउन समस्या हुन सक्छ। पश्चिमी देशहरूले युक्रेनलाई हतियार दिन जारी राख्नेछन्। र त्यसपछि सायद धेरै वर्ष पछि सम्भवतः रूसमा नयाँ नेतृत्वको साथ, रूसी सेनाले अफगानिस्तानमा जस्तै युक्रेन छोड्न सक्छ। सन् १९७९ देखि १९८९ सम्म सोभियत संघ अफगान विद्रोहीहरूसँग लडाइँमा व्यस्त रहँदा उनीहरूले थाकेर अफगानिस्तान छोड्नुपरेको थियो ।

युद्ध युरोपमा फैलिन सक्छ
यो युद्ध युक्रेन बाहिर पनि फैलिने सम्भावना छ । राष्ट्रपति पुटिनले सोभियत युगका थप भागहरू कब्जा गर्न मोल्डोभा र जर्जियाजस्ता पूर्व सोभियत देशहरूमा सेना पठाउन सक्छन्। यी देशहरू नेटोका हिस्सा होइनन्। वा यो पनि गलत अनुमान पनि हुनसक्छ ।

पुटिनले युक्रेनलाई हतियार दिनुलाई पश्चिमी देशहरूको उत्तेजक कार्यको रूपमा लिन सक्छन्। ती नाटो सदस्यहरूले कालिनिनग्रादको रूसी तटमा भूमि कोरिडोर निर्माण गर्न बाल्टिक देशहरूमा सेना पठाउने धम्की दिन सक्छन्। यो धेरै खतरनाक हुन सक्छ र नेटोसँग युद्धको खतरा छ किनभने नेटोको धारा ५ अनुसार नेटोको एक सदस्यमा आक्रमण सबै सदस्यहरूमा आक्रमण भएको मानिन्छ।

यदि पुटिनले आफ्नो नेतृत्व बचाउने एउटै उपाय हो भन्ने महसुस गरे भने उनले त्यसो गर्न सक्थे। हामीलाई थाहा छ कि उनी लामो समयदेखि चलिरहेको अन्तर्राष्ट्रिय मान्यताहरू तोड्न चाहन्छन्। आणविक हतियारको प्रयोगमा पनि यही कुरा लागू हुन्छ। तर, विज्ञहरूका अनुसार परमाणु आक्रमणको सम्भावना कम छ ।

तर, यदि पुटिनले आफ्नो नेतृत्व बचाउने एक मात्र उपाय हो भन्ने महसुस गरे भने उनले जोखिम मोल्न सक्छन्। यदि उनीहरूलाई कुनै न कुनै रूपमा युक्रेनमा हारजस्तो अवस्थाको सामना गर्नुपर्‍यो भने उनीहरू त्यहाँबाट पनि अगाडि बढ्न सक्छन्। यो अहिले सबैलाई थाहा छ कि पुटिन लामो समयदेखि चलिरहेको अन्तर्राष्ट्रिय नियमहरू तोड्न चाहन्छन्। आणविक हतियारको प्रयोगमा पनि यही तर्क लागू गर्न सकिन्छ। यो हप्ता यसले आफ्नो आणविक शक्तिलाई उच्च सतर्कतामा राखेको छ।

यद्यपि, अधिकांश विश्लेषकहरू हाल तिनीहरूको प्रयोगको बारेमा शंकास्पद छन्। तर यो एक अनुस्मारक हो कि रूसी सिद्धान्तले युद्धको मैदानमा आणविक हतियारहरूको रणनीतिक प्रयोगलाई अनुमति दिन्छ।

कूटनीतिक समाधान 
सबै परिस्थितिका बाबजुद पनि कूटनीतिक समाधानको सम्भावना अझै रहन्छ कि ? संयुक्त राष्ट्रसंघका महासचिव एन्टोनियो गुटेरेसले भनेका छन्, ‘लडाई चलिरहेको छ, तर वार्ताको बाटो सधै खुला छ ।’

वार्ताहरु भइरहेका छन् । फ्रान्सेली राष्ट्रपति म्याक्रोनले पुटिनसँग फोनमा कुरा गरे। कूटनीतिज्ञहरू भन्छन् कि चीजहरू रसियालाई पठाइएको छ। र अचम्मको कुरा रूस र युक्रेनका अधिकारीहरू बेलारूसी सीमामा भेटेका छन्। सायद अर्को केही भएन। तर, वार्ताका लागि तयार भएका पुटिनले कम्तिमा युद्धविरामको सम्भावनालाई स्वीकार गरेको देखिन्छ।

मुख्य प्रश्न पश्चिमी कूटनीतिज्ञहरूले ‘अफ र्‍याम्प’ अर्थात् सबै पक्षहरू युद्धको बाटोबाट बाहिर निस्कने तरिका प्रस्ताव गर्नेछन् कि भन्ने हो। कूटनीतिज्ञहरू भन्छन् कि यो महत्त्वपूर्ण छ कि पुटिनलाई पश्चिमको प्रतिबन्ध हटाउनको लागि के लिन्छ भनेर थाहा छ त्यसैले उनको अनुहार बचाउने सम्झौता खुल्न सक्छ।

अब यो युद्धले रूसको लागि धेरै नराम्रो नतिजा ल्याउने हो भने के हुने सम्भावनालाई विचार गर्नुहोस्। रणभूमिबाट शव रुसमा पुगेपछि देशभित्र विरोध प्रदर्शन बढ्दै जानेछ । पुटिनले आफूले प्रकोपलाई अँगालेको महसुस गर्न सक्छ। उनीहरूले अनुमान गर्न सक्छन् कि युद्ध जारी राख्नुले यसलाई अन्त्य गर्ने निर्णय भन्दा उनीहरूको नेतृत्वमा ठूलो खतरा निम्त्याउन सक्छ। साथै, उसले चीनले रुसबाट तेल र ग्यास नकिन्दासम्म त्यसो नगर्ने बताउन सक्छ। त्यसपछि पुटिनले नयाँ बाटो खोज्नुपर्छ।

यसैबीच युक्रेनी अधिकारीहरूले आफ्नो देशमा भइरहेको विनाशलाई ध्यानमा राख्दै जीवनको यो डरलाग्दो विनाश भन्दा राजनीतिक समाधान राम्रो छ भन्ने निष्कर्षमा पुग्न सक्छन्। त्यसैले कूटनीतिक पहलले यसको समाधान हुन्छ ।

अर्कोतर्फ मानौं कि युक्रेनले क्रिमिया र डोनबासका केही भागहरूमा रुसको सार्वभौमसत्ता स्वीकार गर्छ। त्यसैले बदलामा पुटिनले युक्रेनको स्वतन्त्रता र युरोपसँगको सम्बन्धलाई स्वीकार गर्न सक्छन्। त्यो सम्भावना देखिँदैन। तर यो हुन असम्भव छैन, यो परिदृश्य रक्तरंजित द्वन्द्वको मलबेबाट पनि निस्कन सक्छ।

त्यसोभए के पुटिन सत्ताबाट हटाइनेछन् ?
र त्यसपछि पुटिनलाई के हुनेछ ? जब उनले आक्रमणको घोषणा गरे । उनले घोषणा गरे कि ‘हामी कुनै पनि परिणामको लागि तयार छौं।’

तर के हुन्छ यदि त्यो परिणामले उनलाई सत्ताबाट हटाउनुपर्ने अवस्था आयो भने यो अकल्पनीय जस्तो लाग्न सक्छ। अहिले पनि विश्वमा जति तीव्र गतिमा परिवर्तनहरू भइरहेका छन्, त्यस्ता कुराहरू पनि सोच्न सकिन्छ ।

सर लरेन्स फ्राइडम्यान, किंग्स कलेज लन्डनमा युद्ध अध्ययनका एमेरिटस प्रोफेसरले यस हप्ता लेखेका छन्, ‘किभ र मस्कोमा शक्ति परिवर्तन हुने सम्भावना देखिन्छ।’

त्यसोभए तिनीहरूले यो कसरी भन्न सक्छन् हुनसक्छ, पुटिनले विनाशकारी युद्धको बाटो लिएका छन्। हजारौं रुसी सैनिक मर्छन्। आर्थिक प्रतिबन्धबाट पीडित हुन्छ। पुटिनका समर्थकको संख्यामा अचानक गिरावट आउँछ। विद्रोहको खतरा पनि उत्तिकै हुन्छ । उनीहरूले रुसको आन्तरिक सुरक्षालाई पनि विपक्षीलाई दबाउन प्रयोग गर्नुपर्छ। तर चीजहरू ठीक हुनुको सट्टा चीजहरू बिग्रियो र रूसी सेना, राजनीति र आर्थिक संसारमा शीर्ष व्यक्तिहरूको पर्याप्त संख्या उनको विरुद्धमा हुनसक्छ ।

पश्चिमा राष्ट्रले पुटिनको स्थानमा कुनै नरमपन्थी नेता सत्तामा आएमा रुसमाथि लगाइएका प्रतिबन्ध हटाउने र सामान्य कूटनीतिक सम्बन्ध पुनर्स्थापित गर्ने स्पष्ट गरिसकेको छ। त्यसैले त्यहाँ एक विद्रोह हुन सक्छ। तर, अहिलेसम्म यो सम्भव छैन । तर यदि उनीसँग भएका मानिसहरूले पुटिनले आफ्नो हितको रक्षा गर्न सक्षम छैनन् भन्ने महसुस गर्न थाले भने यस्तो सम्भावना अकल्पनीय पनि छैन।

निष्कर्ष-
माथिका परिदृश्यहरू पृथक छैनन् ! यी मध्ये केही सँगै फरक परिणामहरू निम्त्याउन सक्छन्। तर यो लडाइँ चलिरहँदा संसार पनि फेरिएको छ र अहिलेको जस्तो अवस्था रहने छैन । रुसको अन्य देशहरूसँगको सम्बन्ध फरक हुनेछ। सुरक्षाको लागि युरोपेली दृष्टिकोण परिवर्तन हुनेछ। र हुनसक्छ उदार अन्तर्राष्ट्रिय नियममा आधारित देशहरूले पनि उनीहरूको लागि उत्तम के हो भनेर निर्णय गरिसकेका छन् ।

स्थानीय निर्वाचन अभियानमा सहभागी हुन प्रधानमन्त्री देउवा नुवाकोटमा

काठमाडौं । प्रधानमन्त्री एवं नेपाली कांग्रेसका सभापति शेरबहादुर देउवा नुवाकोटमा स्थानीय तहस्तरका कार्याक्रममा सहभागी हुन त्यसतर्फ गएका छन् । बिहान ११ बजे नुवाकोट पुगेका देउवाले त्यहाँ दुईवटा गाउँपालिकाको नवनिर्मित भवनको उद्घाटन गर्ने कार्यक्रम रहेको प्रधानमन्त्रीका प्रेस सल्लाहकार गोविन्द परियारले जानकारी दिए ।

देउवाले किस्पाङ गाउँपालिका र तादी गाउँपालिकाको नवनिर्मित भवन उद्घाटन गर्ने परियारले बताए । साथै, अन्य स्थानीय तहका पार्टी कार्यकर्तासँग पनि छलफल र भेटघाट गर्ने कार्यक्रम रहेको छ ।  देउवाको साथमा कांग्रेस नेताहरू डा. रामशरण महत, अर्जुननरसिंह केसी, नुवाकोटका पूर्वजिल्ला सभापति जगदीशनरसिंह केसीलगायत छन् । सबै कार्यक्रम सकेर देउवा दिउँसो  ३ बजेपछि काठमाडौं फर्कने नेता केसीले जानकारी दिए ।

रुसलाई सहयोग गरे चीनलाई अमेरिकाले आर्थिक दण्ड दिने

न्युयोर्क । अमेरिकी राष्ट्रिय सुरक्षा सल्लाहकार जेक सुलिभानले चीनका एक उच्च कूटनीतिज्ञलाई भेट गर्दैछन् । सुलिभानले चिनियाँ कूटनीतिज्ञ याङ जियिचीलाई सोमबार इटालीको राजधानी रोममा भेट गर्न लागेका हुन् ।

भेटका अवसरमा दुई नेताबीच युक्रेन युद्धबारे छलफल हुने जनाइएको छ । सुलिभानले युक्रेन युद्धमा रुसलाई सहयोग गरेमा बेइजिङलाई आर्थिक दण्डको चेतावनी दिन सक्ने रोयटर्सले जनाएको छ । चीनले रुसलाई निरन्तर सहयोग गरेमा उसलाई विश्वव्यापी रुपमा एक्ल्याउने सुलिभानले चेतावनी दिने एक अमेरिकी अधिकारीलाई हवला दिँदै सो समाचार संस्थाले जनाएको हो ।

अमेरिका र अन्य देशका अधिकारीहरूले पछिल्ला सातामा चीनलाई स्पष्ट पार्न खोजेका छन् कि रुसको पक्षमा रहँदा उसले व्यापार प्रवाह र नयाँ प्रविधिको विकासमा मूल्य चुकाउनु पर्नेछ । यसअघि अमेरिकी वाणिज्यमन्त्री जीना रेमन्डोले रसिया निर्यातमा अमेरिकी प्रतिबन्धको उल्लंघन गर्ने चिनियाँ कम्पनीहरूले आफ्ना उत्पादनहरू बनाउन आवश्यक पर्ने अमेरिकी उपकरण र सफ्टवेयरबाट काट्न सक्ने चेतावनी दिएकी थिइन् ।-एजेन्सी

देउवाकै गृहजिल्लामा कांग्रेसभित्र तीव्र विवाद, स्थानीय निर्वाचन अभियान बहिष्कार गर्ने

डडेल्धुरा । सरकारले ३० वैशाखमा स्थानीय तहको चुनावको मिति घोषणा गरेको छ। स्थानीय तहको चुनाव नजिकिँदै गर्दा कांग्रेसका सभापति तथा प्रधानमन्त्री शेरबहादुर देउवाको गृहजिल्ला डडेल्धुरामा कांग्रेसभित्रको विवाद बढ्दै गएको छ।

स्थानीय निर्वाचनको पूर्वसन्ध्यामा पार्टी एकताबद्ध हुनेगरी नेतृत्वले पहल गर्न नसकेको भन्दै जिल्लास्तरीय नेता कार्यकर्ताहरूले चुनावी अभियान बहिष्कार गर्ने चेतावनी दिएका छन्। १४औं राष्ट्रिय महाधिवेशनअघि सम्पन्न सातौं जिल्ला अधिवेशनका क्रममा दुई खेमामा बाँडिएका नेता कार्यकर्ताले पार्टीलाई एकताबद्ध बनाउन दबाब दिँदै आएका छन्।

सातौं जिल्ला अधिवेशनका क्रममा क्रियाशील सदस्यतामा केन्द्रबाट हेरफेर गरिएको र चार सय ६० जना क्रियाशील सदस्यहरूको सदस्यता विना कारण नवीकरण नगरिएको भन्दै तत्कालीन जिल्ला कार्यसमितिले क्रियाशील सदस्यता विवाद नटुंगिएसम्म जिल्ला अधिवेशनमा सहभागी नहुने अडान राखेर जिल्ला अधिवेशन बहिष्कार गरेको थियो।

पार्टी सभापति देउवाको सहयोगमा एकपक्षीय रूपमा जिल्ला अधिवेशन सम्पन्न गर्दै कांग्रेस डडेल्धुराको सभापति बनेका परशुराम नगरपालिकाका नगर प्रमुख भीमबहादुर साउदले पार्टी एकताबद्ध बनाएर लैजाने प्रतिबद्धता व्यक्त गर्दै आएको भए पनि हाल एकपक्षीय रूपमा चुनावी अभियान सञ्चालन हुन थालेपछि फेरि असन्तुष्टि बढ्न थालेको हो।

कांग्रेस डडेल्धुराले स्थानीय तहको चुनावमा आफ्ना उम्मेदवार जिताउन ‘घर घर जाऔँ, कांग्रेस जिताऔँ’ अभियान सञ्चालन गरिरहेको अवस्थामा एकलौटी रूपमा चुनावती अभियान सञ्चालन गरिएको भन्दै असन्तुष्ट नेता कार्यकर्ताहरूले बहिष्कार गर्ने चेतावनी दिएका छन्।

शनिकार परशुराम नगरपालिकाको जोगबुडामा भेला भएका कांग्रेसका स्थानीय नेता कार्यकर्ताहरूले एकपक्षीय रूपमा चुनावी अभियान सञ्चालन गरिन थालिएकोमा तीव्र असन्तुष्टि व्यक्त गरेका छन्।

नगर प्रमुख तथा कांग्रेस डडेल्धुराका सभापति साउदले सातौं जिल्ला अधिवेशनको प्रारम्भदेखि नै पार्टीको विधानविपरीत काम गर्दै इमान्दार नेता कार्यकर्ताहरूलाई पेलेर एकपक्षीय रूपमा जिल्ला सभापति भएको र हाल जिल्लास्तरीय नेता कार्यकर्ताहरूको ठूलो हिस्सा असन्तुष्ट रहेको अवस्थामा एकपक्षीय रूपमा चुनावी अभियान घोषणा गरिएकाले आगामी ५ चैतमा वडास्तर र ८ गते पालिकास्तरमा हुने चुनावी अभियानको कार्यक्रम बहिष्कार गर्ने चेतावनी दिएका हुन्।

कांग्रेस डडेल्धुराका पूर्वउपसभापति धर्मानन्द भट्टको अध्यक्षतामा सम्पन्न कार्यकर्ता भेलाले पार्टी एकताबद्ध बनाउन नेतृत्वलाई दबाब दिने उद्देश्यले संघर्ष समिति समेत गठन गरेको छ। समितिका सदस्यहरूमा प्रतिनिधिसभामा समानुपातिक उम्मेदवार गोपा थापा, कांग्रेस डडेल्धुराका पूर्वसदस्य तथा परशुराम नगरपालिका-१२ का वडाध्यक्ष गणेशप्रसाद जोशी, भोजराज बोहरा, रामसिंह ऐर, दानबहादुर साउद र राजबहादुर भण्डारी सदस्य छन्।

संघर्ष समितिले पार्टीलाई एकताबद्ध बनाएर स्थानीय तहको निर्वाचनमा होमिन नेतृत्वलाई दबाब दिन संघर्षका कार्यक्रम सञ्चालन गर्ने संयोजक भट्टले बताए। उनले पार्टीभित्र इमान्दार नेता कार्यकर्ताहरूलाई पन्छ्याउन खोजिएकाले पार्टी एकताबद्ध नहुन्जेलसम्म वर्तमान जिल्ला कार्यसमतिले अघि सारेका हरेक कार्यक्रमू बहिष्कार गरिने जानकारी दिए।

कांग्रेस डडेल्धुराले स्थानीय तहको चुनावमा आफ्ना उम्मेदवार जिताउन ‘घर घर जाऔँ, काँग्रेस जिताऔँ’ अभियान एकपक्षीय रूपमा सञ्चालन गर्न थालेको छ। २९ फागुनदेखि २९ चैत एक महिनासम्म देशव्यापी रूपमा यो अभियान सञ्चालन गर्न कांग्रेस केन्द्रीय समितिको निर्देशन छ।

डडेल्धुरा जिल्लाका सातवटा स्थानीय तहमा ८ चैतमा एकै समयमा हुने चुनावी सभाका लागि प्रतिनिधिहरू तोकिएका छन्। दुईवटा नगरपालिकामध्ये परशुराम नगरपालिकामा सुदूरपश्चिम प्रदेशसभा सदस्य गोविन्दराज बोहरा र अमरगढी नगरपालिकाका लागि वर्तमान जिल्ला सभापति एवं परशुराम नगर प्रमुख साउद प्रतिनिधि तोकिएका छन्।

यस्तै, भागेश्वर गाउँपालिकामा जिल्ला कार्यसमिति उपसभापति लक्ष्मीप्रसाद अवस्थी, अजयमेरू गाउँपालिकामा जिल्ला कार्यसमिति सचिव हेमराज चटौत, नवदुर्गा गाउँपालिकामा सचिव शेरबहादुर भण्डारी, गन्यापधुरा गाउँपालिकामा जिल्ला कार्यसमिति उपसभापति डिल्लीराज जोशी र आलिताल गाउँपालिकामा पूर्वसभापति रघुवर भट्ट प्रतिनिधि तोकिएको कांग्रेस डडेल्धुराले जनाएको छ।

स्थानीय चुनाव अभियान सफल पार्न जिल्ला कार्यसमिति, महाधिवेशन प्रतिनिधि, महासमिति सदस्य तथा प्रदेशसभा क्षेत्रीय समितिबाट डडेल्धुराका ५२ वटै वडामा प्रतिनिधि खटाइएको छ भने ५ चैतमा वडाहरूको कार्यक्रम सञ्चालन गर्न ५२ जना प्रतिनिधिहरू खटाइएको छ।

यसरी प्रतिनिधि खटाउँदा एकपक्षीय रूपमा खटाइएको भन्दै कांग्रेस डडेल्धुराभित्र तीव्र असन्तुष्टि बढे्को कांग्रेस डडेल्धुराका निवर्तमान उपसभापति करुणाकर भट्टले बताए। उनले अन्य स्थानीय तहमा पनि नेता कार्यकर्ताहरूले एकपक्षीय रूपमा सञ्चालित चुनावी अभियान बहिष्कार गर्ने जानकारी दिए। पार्टी एकढिक्का बनाउन प्रधानमन्त्री तथा सभापति देउवाले भूमिका निर्वाह गर्नुपर्ने स्थानीय नेता कार्यकर्ताको माग छ।

सभापति देउवाले आफूपक्षीय नेता कार्यकर्तालाई अवसर दिने र तत्कालीन जिल्ला सभापति कर्णबहादुर मल्ल पक्षीय नेता कार्यकर्तालाई पेलेर लैजान थालेकाले कांग्रेस डडेल्धुरामा विवाद सिर्जना भएको कांग्रेस डडेल्धुराका निवर्तमान सहसचिव अर्जुनबहादुर मल्लले बताए।

युक्रेन संकटः रुसलाई धक्का, मारिए एकपछि अर्का जनरल

मस्को । युक्रेनमा जारी युद्धमा तेस्रा जनरल पनि मारिएका छन् । आठ दिनभित्र तेस्रा जनरलको मृत्युले युक्रेनमाथि हमला गरिरहेको रुसलाई अर्को झट्का लागेको छ । २९औं संयुक्त हतियार सेनाका मेजर जनरल आन्द्रेई कोलेस्निकोभ युक्रेन युद्धमा मारिने तेस्रो हाइ प्रोफाइलका सेना भएको युक्रेनले दाबी गरेको छ ।

युक्रेन हमलामा २० रुसी सेनापतिहरु सहभागी भएको युक्रेन सरकारको विश्वास छ । रुसले अहिलेसम्म १७३ ट्यांक, १२ विमान, फौज बोक्ने ३४५ क्यारिअर गुमाएको पश्चिमा सञ्चार माध्यमहरुले दाबी गरेका छन् । यसको स्वतन्त्रत पुष्टि हुन बाँकी नै छ ।

रुसी सेनाले आफै निर्णय गर्न नसकेको वा अगाडि बढ्न डराएकाले र सेनापतिहरु मोर्चा सम्हाल्दा जनरलहरुको हताहत भएको पश्चिमा अधिकारीहरुले टिप्पणी गरेका छन् । रुसको ४१ औं सेनाका प्रथम उपकमाण्डर ४५ वर्षीय मेजर जनरल भिटाली गेरासिमोभको हत्या भएको चार दिनपछि  कोलेस्निकोभको मृत्यु भएको हो ।

मारिएका जनरल गेरासिमोभ दोस्रो चेचेन युद्ध, सिरियामा रुसको सैन्य कारबाही र युक्रेनको महत्वपूर्ण क्षेत्र क्रिमियालाई बिलय गरानुअघिको सैन्य कारबाहीमा सहभागी थिए । गेरासिमोभ रुसको सशस्त्र फौज चिफ अफ जनरल स्टाफका छोरा हुन । गत साता मेजर जनरल एन्ड्रिइ सुखोभेत्स्काई मारिएका थिए ।-एजेन्सी

कांग्रेस जिल्ला अधिवेशन सम्पन्नः कहाँ-कसले जिते सभापति ? (सूचीसहित)

काठमाडौँ । ७७ जिल्लामै नयाँ सभापतिसहित कार्यसमिति चुन्दै नेपाली कांग्रेसको १४औं महाधिवेशनले बिट मारेको छ । आइतबार सिन्धुपाल्चोक, सर्लाही, बारा जिल्लाको नेतृत्व चयन गर्दै कांग्रेस जिल्ला अधिवेशन सम्पन्न भएको हो।

गत असोजबाट शुरु भएको कांग्रेस जिल्ला अधिवेशन दसैंअगाडि हिमाली जिल्ला, मंसिर ६ गते एकमात्र निर्वाचन क्षेत्र भएका जिल्ला र मंसिर १० गतेबाट एकभन्दा बढी संघीय निर्वाचन क्षेत्र भएका जिल्लामा भएको थियो । महाधिवेशनबाट निर्वाचित सभापति शेरबहादुर देउवा पक्षले ४४ जिल्ला नेतृत्व हासिल गरेका छन् भने वरिष्ठ नेता रामचन्द्र पौडेल र शेखर कोइराला पक्षले ३३ जिल्लामा सभापति जितेका छन्।

देउवा पक्षबाट निर्वाचित सभापति:-

  1. लमजुङ, सभापति टकराज गुरूङ
  2. सल्यान, सभापति केशवबहादुर विष्ट
  3. डोल्पा, सभापति दीपेन्द्रबहादुर शाही
  4. डडेल्धुरा, सभापति भीमबहादुर साउद
  5. म्याग्दी, सभापति खमबहादुर गर्बुजा
  6. ताप्लेजुङ, सभापति गजेन्द्रप्रसाद तुम्याहाङ
  7. मुगु, सभापति ऐनबहादुर शाही
  8. पाँचथर, सभापति रूपनारायण जवेगु
  9. मनाङ, सभापति शंकर गुरूङ देउवा
  10. हुम्ला, सभापति मोहनविक्रम सिंह
  11. बझाङ, सभापति खड्क बोहरा
  12. रामेछाप, सभापति पूर्णबहादुर (कान्छाराम) तामाङ
  13. जुम्ला, सभापति कर्णबहादुर शाही
  14. जाजरकोट, सभापति बेदराज सिंह
  15. डोटी, सभापति नरेन्द्रबहादुर सिंह
  16. रूकुम पश्चिम, सभापति प्रेमप्रकाश वली
  17. ओखलढुंगा, सभापति तेजेन्द्र खनाल
  18. झापा, सभापति देउमान थेबे
  19. बागलुङ, सभापति जित शेरचन
  20. पर्वत, सभापति युवराज जोशी
  21. इलाम, सभापति डम्बरबहादुर खड्का
  22. सुर्खेत, सभापति खड्ग पोखरेल
  23. रूपन्देही, सभापति रामकृष्ण खाण
  24. कास्की, सभापति किशोरदत्त बराल
  25. काभ्रे, सभापति तीर्थ लामा
  26. तनहुँ, सभापति जितप्रकाश आले
  27. ललितपुर, सभापति जितेन्द्रकुमार श्रेष्ठ
  28. कञ्चनपुर, सभापति पदम बोगटी
  29. उदयपुर, सभापति हिमाल कार्की
  30. भक्तपुर, सभापति दुर्लभ थापा
  31. बर्दिया, सभापति अरूणप्रकाश सिंह राठौर
  32. सोलुखुम्बु, सभापति नाम्गेल जाङ्बु शेर्पा
  33. रसुवा, सभापति पेम्वाछिरिङ तामाङ
  34. धनकुटा, सभापति दिनेश राई
  35. कैलाली, सभापति नारायणदत्त भट्ट
  36. मकवानपुर, सभापति बुद्ध लामा
  37. पर्सा, सभापति जनार्दनसिंह क्षेत्री
  38. सर्लाही, सभापति सुरेन्द्रप्रसाद सिंह
  39. सिन्धुपाल्चोक, सभापति जंगबहादुर तामाङ
  40. धनुषा, सभापति योगेन्द्र पजियार
  41. रौतहट, सभापति सुनिलकुमार यादव
  42. अछाम, सभापति पुष्पबहादुर शाह
  43. बारा, सभापति राजेश राय यादव
  44. सिरहा, सभापति रामचन्द्र यादव

पौडेल र शेखर पक्षबाट निर्वाचित सभापतिः-

  1. प्युठान, सभापति विष्णुकुमार गिरी
  2. अर्घाखाँची, सभापति केशव श्रेष्ठ
  3. रोल्पा, सभापति किशोर आचार्य
  4. बैतडी, सभापति चतुरबहादुर चन्द
  5. दोलखा, सभापति बर्मा लामा
  6. गोरखा, सभापति नन्दप्रसाद न्यौपाने
  7. कालिकोट, सभापति अम्बबहादुर शाही
  8. संखुवासभा, सभापति दीपक खड्का
  9. रूकुमपूर्व, सभापति केशरमान रोका
  10. मुस्ताङ, सभापति रोमीगौचन थकाली
  11. भोजपुर, सभापति विनोद वान्तवा
  12. बाजुरा, सभापति रामसिंह रावल
  13. तेह्रथुम, सभापति अर्जुन तुम्बाहाम्फे
  14. नवलपरासी पश्चिम, सभापति अर्जुनकुमार पोखरेल
  15. पाल्पा, सभापति हिमालदत्त श्रेष्ठ
  16. स्याङ्जा, सभापति राजु थापा
  17. खोटाङ, सभापति विष्णुकुमार राई
  18. दार्चुला, सभापति ललितसिंह बोहरा
  19. नुवाकोट, सभापति रमेश महत
  20. दाङ, सभापति शंकरप्रसाद डाँगी
  21. दैलेख, सभापति मणिराम रेग्मी
  22. गुल्मी, सभापति खिलध्वज पन्थी
  23. काठमाडौं, सभापति कृष्णसबुज बानियाँ
  24. धादिङ, सभापति रामनाथ अधिकारी
  25. सुनसरी, सभापति केदार भण्डारी
  26. कपिलबस्तु, सभापति अब्दुल कलाम खाँ
  27. मोरङ, सभापति डिगबहादुर लिम्बू
  28. चितवन, सभापति राजेश्वर खनाल
  29. बाँके, सभापति नारायण गौडेल
  30. नवलपुर, सभापति महेन्द्रध्वज जिसी
  31. महोत्तरी, सभापति नागेश्वर यादव
  32. सिन्धुली, सभापति उपेन्द्र पोखरेल
  33. सप्तरी, सभापति रामदेव साह

रुसले चीनसँग सैन्य सहयोग माग्योः अमेरिका

न्युयोर्क। रुसले युक्रेनमा लडाइँ गर्न चीनको सैन्य सहयोग मागेको एक अमेरिकी अधिकारीले दाबी गरेका छन् । ती अधिकारीलाई उदृत गर्दै न्युयोर्क टाइम्सले जनाएअनुसार पश्चिमा देशहरुले प्रतिबन्ध लगाएको पृष्ठभूमिमा रुसी प्रशासन केन्द्र क्रेमलिनले चीनलसमक्ष सैन्य सहयोगका लागि अनुरोध गरेको होे । ती अधिकारीले चीनसँग मागेको हतियारबारे भने केही खुलासा नगरेको बताइन्छ ।

भिसा र मास्टरकार्डले रुसमा सञ्चालन बन्द गरेपछि चिनियाँ सरकारी स्वामित्वको युनियनपे र रुसको मिर जस्ता भुक्तानी प्रणालीहरूद्वारा सञ्चालित ‘को व्याज्ड’ कार्डहरू जारी गर्ने सम्भावनाबारे रूसी बैंकहरूले चिनियाँ समकक्षीहरूसँग सम्झौता गरका रिपोर्टहरु यसअघि नै आइसकेका छन् ।मस्कोले चीनसँग हतियार मागेको भन्ने रिपोर्टलाई चीनले अस्वीकार गर्दै आएको छ । अमेरिकास्थित चिनियाँ दूतावासका प्रवक्ता लिउ पेनग्वायुले भनेका छन्, ‘त्यसबारे मैले केही सुनेको छैन ।’

‘अहिलेको मुख्य प्राथमिकता तनावपूर्ण अवस्थालाई नियन्त्रण बाहिर जानबाट रोक्नु हो । चीनले अत्यधिक संयम अपनाउन र ठूलो मानवीय संकटलाई रोक्न आह्वान गरेको छ’ दूतावासको विज्ञप्तिलाई उदृत गर्दै सीएनएनले जनाएको छ ।

यसैबीच, अमेरिकी राष्ट्रिय सुरक्षा सल्लाहकार जेक सुलिभानले विश्वव्यापी प्रतिबन्धहरूको सामना गर्न रसियालाई कुनै पनि सहयोग नगर्न चीनलाई चेतावनी दिएका छन् । सुलिभानले यसै साता चिनियाँ समकक्षीसँग भेट गर्दैछन् ।-एजेन्सी

पूरै गीत हेर्न पाएको छैन, कोही उत्तेजित हुनुपर्ने पनि छैन : प्रचण्ड

धनगढी । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले प्रकाश सपुतकाे गीत ‘पीर’काे म्युजिक भिडियाेमा भइरहेकाे विवादबारे प्रतिक्रिया दिएका छन् ।

माओवादीका जनवर्गीय संगठनसँगै केही नेताहरुले सपुतकाे उक्त गीतकाे म्युजिक भिडियाे युट्युबबाट हटाउनुपर्ने चेतावनी दिइरहेका बेला प्रचण्डले साेमबार धनगढी विमानस्थलमा पत्रकारसँग भने, ‘मैले पूरै गीत हेर्न पाएको छैन, मिडियाबाट थाहा पाएकाे हुँ । अहिले हामी कोही उत्तेजित हुनुपर्ने पनि छैन ।’

शान्ति प्रक्रियामा ल्याएर माओवादीले बर्बाद गर्‍यो भन्ने पनि नरहेकाे उल्लेख गर्दै प्रचण्डले जनयुद्धप्रति हल्का टिप्पणी गर्न पनि नमिल्ने बताए । तर, याे विषयमा सयौं वर्षसम्म पनि बहस रहने उल्लेख गर्दै प्रचण्डले तर्क-वितर्क,पक्ष-विपक्षलाई स्वभाविक रूपले लिनुपर्ने बताए ।

जनयुद्धबाट शान्ति प्रक्रियामा आउनु ठिक थियो कि थिएन भन्नेमा पनि बहस भइरहने उनले बताए ।- न्युज कारखाना

साउदी राजकुमार आज नेपाल आउँदै

काठमाडौं । साउदी अरब अधिराज्यका विदेशमन्त्री राजकुमार फैसल बिन फहरान अल साउद दुई दिने औपचारिक भ्रमणका क्रममा आज नेपाल आउँदै छन् ।

भ्रमणका क्रममा साउदी अरबका विदेशमन्त्री राजकुमार फैसलले राष्टपति विद्यादेवी भण्डारी र प्रधानमन्त्री शेरबहादुर देउवासँग बेग्लाबेग्लै शिष्टाचार भेटवार्ता गर्ने कार्यक्रम रहेको परराष्ट्र मन्त्रालयले जनाएको छ ।

परराष्ट्रमन्त्री डा नारायण खड्काले आफ्ना साउदी समकक्षीसँग भोलि भेटवार्ता गर्ने तथा उनले नेतृत्व गर्नुभएको प्रतिनिधिमण्डलको सम्मानमा दिवाभोज आयोजना गर्ने कार्यक्रम छ ।

कोभिड बढेपछि चीनको अर्को सहरमा पनि लकडाउन

बेइजिङ । कोभिड संक्रमण बढेपछि चीनको १ करोड ७० लाख जनसंख्या भएको शेनझेन  सहरमा  लकडाउन घोषणा गरिएको छ । शेनझेनको दक्षिणी टेक हबले सम्पूर्ण बासिन्दालाई २० मार्चसम्म घरभित्रै बस्न भनेको छ । सो अवधिसम्म सार्वजनिक सवारी साधनहरु पनि नचल्ने स्थानीय सरकारले जारी गरेको सूचनामा उल्लेख छ । कोभिडको नयाँ भेरियन्ट ओमिक्रोन निर्मूल गर्न चुनौती सामना गरिरहेका बेला सरकारले पछिल्लो प्रतिबन्ध लगाएको हो । पछिल्लो समयमा चीनमा कोभिड संक्रमण दर बढ्दो छ ।

‘यदि रोकथाम र नियन्त्रणलाई समयमै र निर्णायक रूपमा सशक्त बनाइएन भने यो सजिलै समुदायस्तरमा फैलिन सक्छ’, शेनजेनका स्वास्थ्य अधिकारी लिन ह्यान्चेङले भने ।

चीनभर संक्रमणमा बृद्धिले अधिकारीहरुलाई सांघाईमा विद्यालय  र उत्तरपूर्वी शहरहरु बन्द गर्न बाध्य बनाएको छ । चीनका १८ ओटा प्रात ओमिक्रोन र डेल्टा भेरियन्टको क्लस्टरसँग जुधिरहेको छ । चीनमा सर्वप्रथम सन् २०१९ को अन्त्यतिर भाइरस देखिएको थियो । त्यसयता सरकारले शून्य–कोभिड नीति अंगिकार गर्दै आएको छ ।

यसअघि कोभिड संक्रमण बढेपछि उत्तरपूर्वी सहर चाङ्गचुनमा यसै साता लकडाउन घोषणा गरिएको थियो ।-एजेन्सी

रुसी सेनाको हमलामा न्युयोर्क टाइम्सका पत्रकार मारिए

किभ । रुसी सेनाको हमलामा न्युयोर्क टाइम्सका एक पत्रकार मारिएका छन् ।  इरपिन सहरमा रुसी फौजको हमलामा न्युयोर्क टाइम्सका भिडियो पत्रकार ब्रेन्ट रिनाउड मारिएको किभ क्षेत्रका प्रमुखले बताएका छन् । हमलामा अर्का एक जना घाइते भएका छन् ।

इरपिनमा युक्रेन युद्धको समाचार रिपोर्ट गरेका भिडियो पत्रकार ब्रेन्ट रिनाउडको रुसी सेनाको गोली प्रहारमा मृत्यु भएको किभ प्रहरी प्रमुले पुष्टि गरेका छन्  । गोली लागेर उनका पार्टनर घाइते बनका छन् । ब्रेन्टको न्युयोर्क टाइम्सको प्रेस पास भए पनि उनी युद्ध क्षेत्रमा असाइनमेन्टमा नरहेको प्राप्त विवरणहरुमा जनाइएको छ ।

हरिनगर गाउँपालिकाको प्रत्येक टोलटोलमा भ्रष्टाचार

सुनसरीको सीमावर्ती हरिनगर गाउँपालिकाको प्रत्येक वडावडा र टोलटोलमा भ्रष्टाचार भएको नागरिकहरुले गुनासो गरेका छन् । अहिले विभिन्न पार्टीहरु गाउँटोल भेला गर्न थालेपछि नागरिकहरुले गाउँगाउँमा अनियमितता, ढिलासुस्ती र भ्रष्टाचार बढेको भन्दै छानविनको माग गरेका छन् । अहिले नेपाली काग्रेंस, नेकपा एमाले, जनता समाजवादी पार्टी , जनमत पार्टी र राप्रपा, नेकपा माओवादी केन्द्र सहितका पार्टीहरुले हरिनगरको सीमादेखी गाउँटोल सम्म टोल भेलामा व्यवस्त बनेको बेला सबैका कार्यक्रममा नागरिकहरुले पार्टी, जाती र अनुहार होईन आवश्यकताको आधारमा विकास गर्नुपर्नेमा जोड दिदै वडा अध्यक्षहरु र सचिबहरुले योजना, कार्यक्रम र संचालन खर्चको नाममा कागज मिलाएर खाएको आरोप सहित समयमा अनियमितता, काम ढिलासुस्ती र बजेटमाम भ्रष्टाचार बढेको भन्दै तत्काल छानविन गर्नुपर्ने माग गरेको एक काग्र्रेसी नेताले सत्य संसार साप्ताहिकलाई बताएका छन् । पूर्व गाविसका अध्यक्षहरुले समेत अहिले गाउँ टोलमा हाम्रो पार्टी नेपाली काग्रेंस सहित नेकपा एमाले, जनता समाजवादी पार्टी , जनमत पार्टी र राप्रपा, नेकपा माओवादी केन्द्र सहितकाले कार्यक्रम र चुनावी अभियान थालेकोमा खुसी लागेको भएपनि विडम्बना भ्रष्टाचार बढेको र बढाउनेलाई कार्वाही नहुदाँ मन खिन्न भएको सुनाएका छन् ।
गाउँमा टोलमा योजना र कार्यक्रम पीछे अनियमितता, ढिलासुस्ती र भ्रष्टाचार बढेको गुनासो आएकाले सत्य संसारको टीम हरिनगर गाउँपालिका २ र ५ मा अनुगमन गर्दा वडा अध्यक्ष र सचिव बीचमा तालमेल नमिलेको कमीसनमा मात्रै व्यस्त भएको फेला परेको छ । उनीहरु माथि छानविनको माग गर्दै समाचारका लागि नागरिकले आग्रह गरेपछि २ का वडा अध्यक्ष इनुस मियाँ र ५ का वडा अध्यक्ष सविव मियाँका वडामा पुग्दा कार्यकक्षमा नबसेको र केही बेरामा आएको भएपनि कार्यक्रम र योजनाको बारेमा अनविज्ञता जनाए । दुवै वडामा क्रमशः वडा सचिव डिम्पल देव र समसाद अंसारी छन् । उनीहरुले पनि कार्यक्रमहरु वडा अध्यक्षले नै बाडेको बताए तर कसरी, कुन प्रकृयाले वितरण गरेको उपभोक्ता, ठेक्केदार र संस्था कसरी छनौट गरे भन्ने बारेमा केही थाहा नभएको गैरजिम्मेबारी अभिव्यक्ति दिएका छन् । यसैबीत म मोहोसिम अंसारीले मलाई मेरो अध्ययन र म कार्यरत्त संचार माध्यममा समाचार प्रयोजनको निमित्त यस दुवै वडा कार्यालयमा रहेको विकास र योजनाका सूचना तथा जानकारीहरु आवश्यक भएकाले नेपालको संविधान, २०७२ को धारा २७ तथा सूचनाको हक सम्बन्धी ऐन, २०६४ को दफा ३ अनुसार ती सूचना तथा जानकारीको प्रमाणित उपलब्ध गराई दिनु हुन निवेदन गर्ता गरोको छु । उक्त निवेदनमा वडा कार्यालयद्धारा गत आ.व.२०७७÷२०७८ र चालु आवमा बजेटमा अनियमितता गरेको गुनासो र आरोप बाहिर आएकाले सत्य, तथ्य बाहिर ल्याउन गापाको काम वा कार्यक्रम वितरणको प्रकृयाहरु के के अपनाएका थिए ?, सम्झौता गरिएका वा सम्पन्न गरिएका संस्था वा निकायको नाम, ठेगाना, प्रोपाइटरको नाम, सम्पर्क नम्बर र उनीहरुले गरेको काम मध्ये राम्रो उत्कृष्ट काम गरेको कुनै दुई कामको विलभरपाईको प्रतिलिपि उपल्बध गराई दिनु हुन । चालु आर्थिक वर्षमा पालिकाको कार्यक्रमहरु कुन प्रकृयामा दिएको हो ? सो को सूचना, पत्रपत्रिका वा अन्य कुनै माध्यम भए सो पनि खुलाई दिनुहुन र वडा अध्यक्ष, वडा सचिवको मिलिभगतमा विकास भन्दा कागजी कार्यक्रम बढी भएको गुनासो आएकाले तथ्यहरुको विवरण र विलभरपाई सहित प्रतिलिपि उपल्बध गराई दिनु हुन आग्रह गरेको छु ।

 

आमालाई औषधि किन्न जाँदा रुसी ट्यांकको हमलामा परिन भ्यालेरिया

न्युयोर्क ।  आफ्नी बिरामी आमालाई औषधि किन्न जाने क्रममा रुसी ट्यांकको हमलामा एक युक्रेनी महिलाको मृत्यु भएको छ । भ्यालेरिया माक्सेत्स्का नाम गरेकी ती महिला आफ्नी आमा र चालकसँगै राजधानी किभनजिकै मारिएका हुन् । उनी अन्तर्राष्ट्रिय विकाससम्बन्धी अमेरिकी सहयोग नियोग यूएसएडमा कार्यरत थिइन् ।

भ्यालेरिया सुरुमा रुसीहरूबाट घेराबन्दीमा परेका वासिन्दाहरूलाई सहयोग गर्न किभमा बस्ने योजना बनाएकी थिइन् । तर, आमालाई औषधि अभावपछि त्यहाँबाट अन्यत्र जाने निर्णय गरेका थिइन । एउटा ट्यांकले भ्यालेरिया र उनकी आमा चढेको गाडिमा गोली चलाएको थियो । पश्चिम किभको एउटा बाटोमा रुसी सेनाको बख्तरबन्दलाई अगाडि बढ्न बाटो दिइरहेका बेला उनीहरु आक्रमणमा  परेका थिए ।

२० करोड डलर मूल्यका हतियार सहयोग
यसैबीच रुसी हमलाबाट जोगाउन अमेरिकाले २० करोड डलर मूल्य बराबरको साना हतियार, एन्टी ट्यांक र एन्टी एयरक्राफ्ट हतियार सहोग गर्ने भएको छ ।

युक्रेनी अधिकारीहरूले रुसी सेनाको भारी गोलाबारीबाट बचाउन थप उपकरणहरू माग गरिरहेका छन् । अमेरिकी राष्ट्रपति जो बाइडेनलाई थप सुरक्षा सहयोगको अधिकार दिएको ह्वाइट हाउसले जनाएको थियो । यस कदमले युक्रेनमा नयाँ सैन्य उपकरणको ‘तत्काल’ ढुवानी सुरु गर्ने एक वरिष्ठ प्रशासन अधिकारीले बताएका छन् ।-एजेन्सी

रुसी हमलामा आवासीय भवनमा ठूलो क्षति: म्याक्स टेक्नाेलाेजी

किभ । युक्रेनको दक्षिणी सहर मारिओपोलमा नागरिक पूर्वाधारहरु र आवासीय भवनहरुमा अत्यधिक क्षति भएको पछिल्लो स्याटलाईट तस्विरहरुले देखाएको छ । कृष्ण सागर बन्दरगाह सहरको पश्चिमा खण्डमा आगो देखिएको हाइ रिजोलुसन तस्विरहरुले देखाएको छ ।

अमेरिकी निजी कम्पनी म्याक्सर टेक्नोलोजीले सार्वजनिक गरेको तस्विरमा दर्जनौं क्षतिग्रस्त अग्ला अपार्टमेन्ट देख्न सकिन्छ । युक्रेनी विदेशमन्त्री दिमित्रो कुलेबाले आफ्नो देशमा आक्रमण गर्ने रुसी सेनाले मारिउपोललाई घेरेको भए पनि युक्रेन अझै पनि आफूहरुकै नियन्त्रणमा रहेको बताए।

डक्टरर्स वीदआउट बोडर्सका अनुसार मारिओपोलको अवस्था निराशजनक छ । त्यहाँ पानी र तापको अभाव छ भने खाद्य आपूर्ति घटिरहेको छ । ‘लाखौं मानिसहरु..सबै उदेश्य र अभिप्रायका लागि घेरिएका छन्,’ मेडिकल च्यारिटीको युक्रेन सञ्चालनको   नेतृत्व गर्नेहरूमध्ये स्टेफेन कोरनिस भन्छन् ।

२४फेब्रुवरीदेखि युक्रेनमा गरेको रुसी हमला र १२ दिने नाकाबन्दीका कारण मारिओपोलमा कम्तीमा १५८२ सर्बसाधारण मारिएका त्यहाँको सिटी काउन्सिलले जनाएको छ ।-एजेन्सी