काठमाडौँ।गृहमन्त्री बालकृष्ण खाँण र अर्थमन्त्री जनार्दन शर्माबीच निर्वाचन लक्षित बजेटबारे छलफल भएको छ ।
गृह मन्त्रालयमा आज भएको छलफलमा निर्वाचन लक्षित बजेटमा पनि विशेषगरी सुरक्षा निकाय (नेपाल प्रहरी र सशस्त्र प्रहरी)का लागि आवश्यक सवारी साधन र बन्दोबस्तीका सामानबारे कुराकानी भएको नीति, योजना, अनुगमन तथा मूल्याङ्कन महाशाखा प्रमुख सहसचिव डा भीष्मकुमार भुसालले जानकारी दिए ।
सहसचिव डा भुसालका अनुसार अब गृह मन्त्रालयले बिहीबारसम्म चालुतर्फको समेत बजेट यकिन गरेर अर्थ मन्त्रालयमा पठाउनेछ ।छलफलमा गृहसचिव टेकनारायण पाण्डे, अर्थसचिव मधु मरासिनीसहित गृह मन्त्रालयका सुरक्षा तथा समन्वय महाशाखा प्रमुख सहसचिव मुकुन्द निरौलालगायतको सहभागिता थियो । गृहमन्त्री खाँणले निर्वाचनको कामलाई घनिभूतरूपमा अगाडि बढाउन अर्थमन्त्री शर्मासँग छलफल गरेका थिए ।
अर्थमन्त्री शर्माले निर्वाचनमा अर्थ मन्त्रालयलाई परेको चापबारे अवगत गराउँदै अत्यावश्यक र गर्नैपर्ने विषयबारे जानकारी गराउन आग्रह गरेका थिए । गृहमन्त्री खाँणले अर्थ मन्त्रालयलाई परेको दबाबबारे गृह मन्त्रालय सचेत रहेको र नभई नहुने विषयवस्तुबारे अवगत गराइने जानकारी दिए ।
नेपाल प्रहरी र सशस्त्र प्रहरीले निर्वाचनमा खटिनका लागि सवारी साधन र बन्दोबस्तीका सामान माग गरेपछि गृहमन्त्री खाँणले अर्थमन्त्रीसँग छलफल गरेका थिए ।-रासस
काठमाडौं। विश्वमा कोरोना भाइरस संक्रमितको संख्या ४० करोड नाघेको छ । मंगलबार एकैदिन विश्वमा २६ लाख १४ हजार ८ सय जना नयाँ संक्रमित थपिएसँगै कूल संक्रमितको संख्या ४० करोड नाघेको हो ।
वल्डोमिटर्सको तथ्याङ्क अनुसार विश्वमा हालसम्म ४० करोड १२ लाख ८८ हजार ३८० जनामा कोरोना भाइरसको संक्रमण पुष्टी भइसकेको छ । संक्रमितमध्ये ३२ करोड ११ लाख २० हजार २७० जना निको भइसकेका छन् । हालसम्म कोरोना संक्रमणका कारण ५७ लाख ८३ हवा १८२ जनाको मृत्यु भएको वल्डोमिटर्सको तथ्याङ्कले देखाएको छ ।
विश्वमा पहिलो पटक कोरोना भाइरस सन् २०१९ डिसेम्बर अन्तिम साता चीनको वुहानमा देखिएको थियो । त्यसपछि यो विश्वभर फैलिएको हो । विश्वमा सबैभन्दा बढी कोरोना संक्रमित अमेरिकामा रहेका छन् । अमेरिकामा हालसम्म ७ करोड ८५ लाख ५६ हजार १९३ जनामा कोरोना पुष्टी भइसकेको छ ।
अमेरिकापछि कोरोना संक्रमितको दोस्रो ठूलो संख्या भारतमा रहेको छ । भारतमा हालसम्म ४ करोड २४ लाख १० हजार ९७६ जनामा कोरोना संक्रमण पुष्टी भएको छ । वल्डोमिटर्सको अनुसार ब्राजिलमा २ करोड ६७ लाख ७६ हजार ६२०, फ्रान्समा २ करोड १० लाख ३९ हजार ६३९, बेलायतमा १ करोड ७९ लाख ३२ हजार ८०३ जनालाई कोरोना संक्रमण भएको छ ।
कोरोनाले सबैभन्दा बढीको ज्यान अमेरिकामा लिएको छ । हालसम्म अमेरिकामा ९ लाख ३२ हजार ४४३ जनाको मृत्युको कारण कोरोना बनेको छ । कोरोनाका कारण ब्राजिलमा ६ लाख ३३ हजार ८९४, भारतमा ५ लाख ५ हजार ३०८, रुसमा ३ लाख ३६ हजार ७२१ र मेक्सिकोमा ३ लाख ९ हजार ८८४ जनाको मृत्यु भएको छ ।
शिक्षा, विज्ञान तथा प्रविधिमन्त्री देवेन्द्र पौडेलले शिक्षकलाई पनि निजामती कर्मचारी सरह सेवासुविधाको प्रबन्ध गरिने बताएका छन्। ताराखोला गाउँपालिकाद्वारा आज आयोजित शैक्षिक अन्तक्र्रियामा उनले सेवासुविधा र अवसरमा शिक्षकलाई विभेद नगरिने उल्लेख गरे।
‘यस विषयमा मन्त्रालयले निर्णय गरिसकेको छ, आउँदो बजेट, कार्यक्रमपछि कार्यान्वयनमा आउँछ’, मन्त्री पौडेलले भने, ‘अर्थ मन्त्रालय र अरू निकायसँग पनि समन्वय भइरहेको छ।’ कर्मचारी र शिक्षकको कार्यविभाजन फरक भए पनि तह र सुविधा एउटै हुनुपर्ने मन्त्री पौडेलले बताए।
शिक्षकको वृत्ति विकासमा शिक्षा मन्त्रालय संवेदनशील रहेको उनको भनाइ छ। मन्त्री पौडेलले १८ वर्षदेखि रोकिएको शिक्षकको आन्तरिक बढुवाका लागि विज्ञापन खुलाएर प्रक्रिया अगाडि बढाइएको बताए।
शिक्षक सेवा आयोगको ११ औं संशोधन नियमावली मन्त्रिपरिषदबाट स्वीकृत भएपछि शिक्षक दरबन्दी मिलान, आन्तरिक बढुवा, अध्यापन अनुमति पत्रलगायत कामले गति लिएको उनको भनाइ छ। मन्त्री पौडेलले शिक्षक महासंघका ३३ बुँदे माग सम्बोधनका लागि मन्त्रालय गम्भीर रहेको बताउँदै कतिपय माग पूरा हुँदै आएको बताए। विद्यालय समायोजनको प्रक्रिया अगाडि बढाइएको उल्लेख गर्दै अति न्यून विद्यार्थी भएका विद्यालयको पहिचान गरी अन्य विद्यालयसँग गाभिने उनको भनाइ छ।
मन्त्री पौडेलले सार्वजनिक शिक्षा सुधारका लागि मन्त्रालयले ५५ बुँदे योजना बनाएर काम थालेको उल्लेख गरे। उनले संघीय शिक्षा ऐन, उच्च शिक्षा ऐन र प्राविधिक शिक्षा ऐन निर्माणमा मन्त्रालयले गर्नुपर्ने काम सकिएको बताउँदै अन्य मन्त्रालयसँग छलफल गरी मन्त्रिपरिषदमा लैजाने तयारी भएको बताए।
मन्त्री पौडेलले ताराखोलामा प्राविधिक शिक्षा तथा व्यावसायिक तालिम परिषद् अन्तर्गतको प्राविधिक शिक्षालय स्थापना गर्ने प्रतिबद्धतासमेत जनाए। उनले ताराखोलामा आधुनिक सुविधायुक्त पुस्तकालय निर्माणका लागि मन्त्रालयमार्फत पहल लिने बताए।
काठमाडौँ । युद्धका लागि प्रयोग हुने ड्रोनहरू कुनै समय सैन्य महाशक्तिहरूको स्वामित्वमा मात्र थिए, तर अब ती ड्रोनहरू विद्रोहीहरू, साना देशहरूसँग पनि छन् र युद्धको तरिका परिवर्तन गर्दैछन्।
सैन्य इतिहासमा यो अक्सर देखिन्छ कि कसरी एउटै हतियार सम्पूर्ण युद्धको प्रतीक हुन्छ। तपाईं मध्ययुगीन युगमा बेलायती धनुर्धारीहरूले प्रयोग गर्ने लामो धनुष वा दोस्रो विश्वयुद्धको जमिनमा लडाइँको विशिष्ट रूपमा रहेका सशस्त्र ट्याङ्कहरूको बारेमा सोच्न सक्नुहुन्छ।
मानवरहित एमक्यू १ प्रिडेटर वा यूएभीएसले पनि अफगानिस्तान, इराक वा अन्य ठाउँमा छेडिएको आतंकवादप्रति अमेरिकी युद्धमा उस्तै प्रतिष्ठा पाएको थियो।
यो शीतयुद्धको अन्त्य पछिको ‘एकध्रुवीय क्षण’ थियो जब अमेरिका कुनै चुनौती बिना एक प्रमुख महाशक्तिको रूपमा एक्लै उभिएको थियो। ड्रोनले प्रतिष्ठित स्थिति प्राप्त गर्यो जब प्रिडेटरलाई टोही विमानको रूपमा परिकल्पना गरिएको थियो र हेलफायर मिसाइलले सुसज्जित थियो।
ड्रोनको पछिको रीपर विशेष गरी शिकारी-हत्याराको रूपमा विकसित गरिएको थियो। यसअघि आएका कुनै पनि ड्रोनभन्दा यसको ठूलो दायरा छ र यो धेरै युद्धजन्य सामान बोक्न सक्षम छ। यी ती हत्याराहरू हुन् जसबाट अमेरिकाले आफ्ना शत्रुहरूलाई आफ्नो लक्ष्य बनाउन सक्छ, जहाँ शत्रुहरूले कल्पना पनि गर्न सक्दैनन्।
जनवरी २०२० मा बगदाद एयरपोर्ट बाहिर इरानका जनरल कासिम सुलेमानीलाई निशाना बनाउने रिपर ड्रोन थियो भन्ने विश्वास गरिन्छ। तर, धेरै छोटो समयको लागि केवल अमेरिका वा इजरायलले यो प्रविधिमा शासन गर्न सक्छ। यो युद्ध ड्रोनको पहिलो युग मान्न सकिन्छ। त्यसयता स्थितिमा निकै तीव्र परिवर्तन देखिएको छ ।
धेरै नयाँ खेलाडीहरू (देशहरू) मैदानमा प्रवेश गरेर युद्ध ड्रोनहरू बनाइरहेका छन् । यूएभीएसको प्रयोग आतंकवाद, आतंकवादप्रति युद्धबाट पूर्णतया परम्परागत युद्धमा सरेको छ। वास्तवमा ड्रोनहरू तिनीहरूको तेस्रो युगको कुर्सीमा छन् जहाँ प्रविधि अत्यन्त जटिल छ र कृत्रिम बुद्धिमत्तासँग जोडिएको छ।
हन्टर किलर एमक्यू ९ रीपर
-यसको अगाडि भागमा क्यामेरा र तल सेन्सरसहितको क्यामेरा
-राम्रो स्थिरताको लागि भी आकारको पुच्छर
-यो जीपीएस वा लेजर निर्देशित मिसाइल र बमबाट सुसज्जित
-लम्बाइ- १०.९७ मिटर (३६ फिट)
-उचाई- ३.६६ मिटर (१२ फिट)
-पखेटा- २१.१२ मिटर (६९ फिट ३ इन्च)
-शीर्ष गति ४६३ प्रतिघण्टा
टाइग्रे पिपुल्स लिबरेसन फ्रन्ट टीपीएलफका विद्रोहीहरूले आक्रमणको सामना गर्दै इथियोपिया सरकारको लागि हालैको द्वन्द्वमा ड्रोन आक्रमणहरूले महत्त्वपूर्ण भूमिका खेलेको छ।
इथियोपिया सरकारले टर्की र इरानबाट सशस्त्र ड्रोन खरिद गरेको छ। संयुक्त अरब इमिरेट्स (युएई) हुँदै चीनको विङ लुङ–२ सम्म पनि यसको पहुँच रहेको बताइएको छ । युएईले लिबियाको गृहयुद्धमा आफ्नो सहयोगी जनरल खलिफा हफ्तारलाई चीनमा बनेको ड्रोन पनि उपलब्ध गराएको थियो।
ड्रोनकाे महत्त्वपूर्ण भूमिका
टर्कीले यो ड्रोन सिरियामा फेब्रुअरी २०२० मा अपरेशन स्प्रिंग शिल्ड र लिबियामा खलिफा हफ्तारको विद्रोही सेनाको बिरूद्धमा प्रयोग गरिसकेको छ। सशस्त्र ड्रोनको निर्णायक प्रभाव धेरै पटक देखियो। यसले लिबियाको मान्यता प्राप्त सरकारको अस्तित्वमा योगदान पुर्याएको छ, जबकि गत वर्ष नार्गोनो-काराबाख युद्धमा पनि यसले महत्त्वपूर्ण भूमिका खेलेको थियो।
टर्कीबाट प्राप्त ड्रोनका कारण अजरबैजानको सेनाले आर्मेनियाको विवादित क्षेत्र आफ्नो नियन्त्रणमा लिन सफल भएको थियो। टर्कीले यो ड्रोन सिरियामा फेब्रुअरी २०२० मा अपरेशन स्प्रिंग शिल्ड र लिबियामा खलिफा हफ्तारको विद्रोही सेनाको बिरूद्धमा प्रयोग गरिसकेको छ।
ड्रोन आक्रमणहरूले अक्सर कानुनी र नैतिक दुविधाहरू सिर्जना गर्दछ। तिनीहरूको फायरपावर ड्राइभ गर्ने व्यक्तिको सीपमा निर्भर गर्दछ। हतियार सीमित गर्ने सम्झौताहरूले उनीहरूको प्रयोगलाई रोक्ने आशा अहिलेसम्म व्यर्थ साबित भएको छ। अमेरिकाले आफ्नो टेक्नोलोजी आफ्नो नजिकका सहयोगीहरूबाहेक अरू कुनै देशलाई दिन हिचकिचाइरहेको छ, जबकि अन्य देशहरूले भेदभाव गर्दैनन्।
निस्सन्देह यूएभीएस बढ्दै गएको गति रोक्न गाह्रो देखिन्छ। १०० भन्दा बढी देशहरू र गैर-देशी समूहहरूसँग ड्रोनहरू छन्। यीमध्ये धेरैसँग सशस्त्र ड्रोनहरू छन्।
सेन्टर फर न्यू अमेरिका सेक्युरिटीका अध्ययन निर्देशक पल शेरर भन्छन्, ‘ड्रोनको बृद्धि जारी रहेको देखिन्छ। चीन संसारमा सशस्त्र ड्रोनको सबैभन्दा ठूलो निर्यातकर्ता हो। इरान, टर्कीजस्ता मध्य शक्तिहरूसँग ड्रोनको प्रविधि छ र उनीहरूले ती प्रणाली विदेशमा बेचिरहेका छन्।’
उनी तर्क गर्छन् कि ‘व्यावसायिक ड्रोन टेक्नोलोजी यति सजिलैसँग उपलब्ध छ कि जो कोहीले पनि केहि सय डलरमा कच्चा डीआईवाई आक्रमण ड्रोन बनाउन सक्छ, जसमध्ये केही आतंकवादी संगठनहरूसँग पनि छन्।’
‘यूएभीएसको निर्णायक प्रभाव कुनै आश्चर्यको कुरा होइन,’ उनी भन्छन्। उनीहरूले कुनै पनि देशलाई सस्तोमा वायुसेना उपलब्ध गराउँदै आएका छन् ।
ड्रोन कति प्रभावकारी छन् ?
लडाकु विमान किन्न नसक्ने कुनै पनि देश वा समूहले ड्रोन किन्न सक्छ। शेरर भन्छन्, ‘यी ड्रोनहरू लडाकू विमानहरू जत्तिकै लडाइँ गर्न सक्षम नहुन सक्छन्, तर तिनीहरूले केही वायु शक्तिहरूलाई निर्णायक किनारा दिन सक्छन्। डिजिटल प्रविधिको मद्दतले टोही र सटीक आक्रमण गर्ने क्षमता भएका ड्रोनहरू धेरै घातक हुन सक्छन्।’
तर, गृहयुद्ध वा क्षेत्रीय द्वन्द्वमा यूएभीएसको प्रयोग भविष्यको युद्धमा ड्रोनले खेल्ने महत्त्वपूर्ण भूमिकाको झलक मात्र हो।
जब अमेरिका र उसका सहयोगीहरू आतंकवाद विरोधी अभियानमा संलग्न थिए, रुसले सिरियामा यसको प्रयास गरिरहेको थियो। रुसले यसलाई ठूलो युद्धमा कसरी प्रयोग गर्ने भन्ने कुरालाई ध्यानमा राख्दै सिरियालाई आफ्नो परीक्षण स्थलको रूपमा राखेको थियो।
सेन्टर फर नेभल एनालिसिसका रुस स्टडीज प्रोग्रामका सदस्य स्यामुएल बेन्डेट भन्छन्, ‘सिरियामा रसियाको ड्रोन फ्लीटले महत्वपूर्ण खुफिया, निगरानी, जासूसी अभियानहरू सञ्चालन गर्यो। ड्रोन सर्वेक्षणले रूसी हतियारहरू, रकेट प्रक्षेपण प्रणालीहरूमा वास्तविक-समय पहुँच सक्षम गरेको छ।’
‘यसले एक पटक फेरि परिभाषित गरिरहेको छ कि कसरी रूसी सेनाले आज र भविष्यमा यूएभीएस र सर्वेक्षण गरिएको युद्धभूमि फोटोहरूको सहयोगमा लड्नेछ। यो त्यस्तो चीज हो जुन आज भन्दा पहिले जनरलहरूले गर्थे ।’
रूस र ड्रोन
रुसले युक्रेनसँगको लडाइमा यूएभीएसलाई व्यवस्थित रूपमा प्रयोग गर्नेबारे सोचिरहेको छ । बेन्डेट भन्छन् कि ड्रोनको मुख्य मिशन बुद्धिमत्ता सङ्कलन र टोहीको भूमिका प्रदर्शन गर्नु हो। विशेष प्रकारका रूसी ड्रोनहरू यसका लागि उपयुक्त छन्।
इलेक्ट्रोनिक युद्ध भनेको त्यस्तो कला हो जसमा शत्रुको शक्ति उनीहरूले पठाएको संकेतबाट नापिन्छ र उसको सञ्चारमा बाधा पुर्याएर उसलाई अलग पार्छ। उन्नत र उन्नत प्रविधिको मामिलामा रुस अमेरिकाभन्दा एक दशक पछाडि हुन सक्छ, तर रुसी सेना आफ्नो लडाकु दलमा ड्रोन समावेश गर्न धेरै अगाडि हुन सक्छ।
‘सैन्य ड्रोन सम्पूर्ण रुसी सैन्य बलसँग अवस्थित छ र युक्रेनको सशस्त्र इकाइहरूलाई तुरुन्तै पहिचान गर्दा यसको उपयोगिता देखिन्छ । यसको सञ्चार काटिदिएको थियो र तोपहरू तिनीहरूतिर फर्काइएको थियो ,’ बेन्डेट भन्छन्।
ड्रोनसँग प्रतिस्पर्धा गर्न किन सजिलो छैन ?
वास्तवमा युक्रेनसँग टर्कीका ड्रोनहरू पनि छन्, जुन उनीहरूले डोनबलका रुस समर्थक पृथकतावादीहरूमा प्रयोग गरेका थिए। ड्रोनहरू आज पनि विद्रोही र मिलिशिया इकाइहरूले उच्च-तीव्रताको युद्धक्षेत्रभन्दा बाहिर प्रयोग गर्छन्। तर, ड्रोनको खतरालाई राम्ररी चिनिए पनि यसको प्रतिकार गर्न त्यति सजिलो हुनेछैन।
पल शेरर भन्छन्, ‘आज प्रयोगमा रहेका धेरैजसो ड्रोनहरू परम्परागत विमानहरू भन्दा धेरै साना छन् र विभिन्न वायु प्रतिरक्षा चाहिन्छ। तिनीहरू धेरै बिस्तारै र कम उचाइमा उड्छन्। यसको मतलब यो हो कि धेरै वायु रक्षा प्रणालीहरूसँग तिनीहरूलाई मार्ने तरिका हुँदैन।’
उनी भन्छन्, ‘धेरै देशहरूले ड्रोन आक्रमणलाई कसरी जवाफ दिने भनेर विकास गर्न काम गरिरहेका छन्। आगामी दिनहरूमा हामी युद्धको मैदानमा ड्रोन रोक्न धेरै प्रभावकारी तरिकाहरू देख्नेछौं।’ तर, धेरै संख्यामा ड्रोन आक्रमण भएमा यसलाई रोक्न ठूलो चुनौती हुनेछ किनभने कम लागतमा ड्रोन ठूलो संख्यामा बनाउन सकिन्छ । तथाकथित भविष्य ‘ड्रोन स्वार्म्स’को बारेमा धेरै कुरा भएको छ।
‘हामीले ठूलो संख्यामा ड्रोन हमलाहरू देखेका छौं, जब २०१८ मा सिरियाली विद्रोहीहरूले १३ ड्रोनको सहयोगमा रूसी हवाई अड्डाहरूमा आक्रमण गरे,’ पल शेरर भन्छन्। यद्यपि, पॉल शेररले ड्रोनको बृद्धि झुण्डको जस्तै होइन भनी जोड दिन्छन् ।
झुण्डको बारेमा उनी भन्छन् कि त्यस्ता आक्रमणहरू ड्रोनहरूको संख्याले परिभाषित गर्दैन, तर तिनीहरूको सहयोग र कुनै मानव हस्तक्षेप बिना प्रक्षेपण गर्ने क्षमताले परिभाषित गर्दछ। ड्रोनको झुण्डलाई विभिन्न दिशामा र निरन्तर आक्रमणमा प्रयोग गर्न सकिन्छ। र अन्तमा ड्रोनको प्रयोगले युद्धको पाठ्यक्रम र दिशा परिवर्तन गर्न नाटकीय प्रभाव पार्न सक्छ । -बीबीसी
टोकियो । जापान भूकम्पीय दृष्टिले एकदमै जोखिम देश हो । केही वर्षको अन्तरालमा जापानीले बारम्बार भूकम्प महशुस गर्छन । बारम्बार भूकम्प जानुमा वैज्ञानिकहरुले एउटा नयाँ तथ्य खुलासा गरेका छन् । उनीहरुका अनुसार दक्षिणी जापानमा ठूलो भूकम्प जानुको कारण जमिनमुनि रहेका पहाड आकारका चट्टानका ठूला रास हुन सक्छन् ।
वैज्ञानिकहरुले दक्षिणी जापानको तटमुनि कुमानो प्लुटोन नामक संरचना फेला पारेका छन् । ठूला भूकम्पहरुबाट आउने टेक्टोनिक उर्जा यस वरपरको विभिन्न विन्दुहरुमा डाइर्भट हुने गरेको कुमानो प्लुटोनको ३ डी भिजुअलाइजेसनले खुलासा गरेको वैज्ञानिकहरुको भनाई छ ।
‘कहिले, कहाँ र कसरी ठूला भूकम्प जान्छन् भनेर ठ्याक्कै हामीले भविष्यबाणी गर्न सकिदैन । तर, हाम्रो नमुनालाई मोनिटरिङ डाटासँग मिलाउदा हामी निकट भविष्यका प्रक्रियाहरु अनुमान सुरु गर्न सक्छौं,’ जापान एजेन्सी फर म्यारिन अर्थ साइन्स एन्ड टेक्नोलोजीका भूभौतिकविद् शुइची कोदाइरा भन्छन् । उनको भनाईलाई अस्टिन वेबसाइटमा युनिभर्सिटी अफ टेक्सासले उदृत गरेको छ ।
कुमारनो प्लुटनोको वास्तविक हद (क्षेत्र) लाई बुझ्न वैज्ञानिकहरुले २० वर्षदेखिको भूकम्पीय तथ्यांक जाँच गरेका थिए । सो कार्यका लागि सेस्मिक सेन्सर्सको जापान नेटवर्कबाट लाखौं रेकर्डहरु समावेश गरिएको थियो । अहिलेसम्मकै ठूलो सेस्मिक डाटालाई विश्वविद्यालयको सुपर कम्प्युटर लोनस्टार५ लाई प्रदान गरिएको थियो । कुमानो प्लुटोन निकै घना र कठोर हुने र यसले भूकम्प गराउने टेक्टोनिक गतिविधिलाई सहयोग गर्ने अनुसन्धानकर्ताहरु विश्वास गर्छन् । -एजेन्सी
आज सात कम्युनिस्ट पार्टीले अमेरिकी सहयोग परियोजना मिलेनियम च्यालेन्ज कर्पोरेसन (एमसिसी) खारेज गर्न माग गर्दै संयुक्त रूपमा संसद् भवन घेराउ गर्ने भएका छन्। नेत्रविक्रम चन्द ‘विप्लव’ नेतृत्वको नेकपासहित विभिन्न कम्युनिस्ट पार्टीले बुधबार दिउँसो संघीय संसद् घेराउ गर्ने भएका हुन्।
जसमा सत्ता गठबन्धनबाट अलग्गिँदै राष्ट्रिय जनमोर्चा पनि सामेल भएको छ। एमसीसीको विरोधमा जनमोर्चासहित विप्लव नेतृत्वको नेपाल कम्युनिस्ट पार्टी, मोहनविक्रम सिंह नेतृत्वको नेपाल कम्युनिस्ट पार्टी (मसाल), मोहन वैद्य नेतृत्वको नेपाल कम्युनिस्ट पार्टी (क्रान्तिकारी माओवादी), ऋषि कट्टेल नेतृत्वको नेपाल कम्युनिस्ट पार्टी, आहुती नेतृत्वको वैज्ञानिक समाजवादी कम्युनिस्ट पार्टी नेपाल, कर्णजित बुढाथोकी नेतृत्वको नेकपा माओवादी केन्द्र समाजवादी एकजुट भएका हुन्।
चितवन । नेकपा (एमाले) चितवनले १०औँ अधिवेशन उद्घाटन भएको एक महिनापछि नेतृत्व पाएको छ । अधिवेशन उद्घाटन भएसँगै कोरोनाको तेस्रो लहर सुरुभएपछि अनिश्चितकालका लागि अधिवेशन स्थगित गरिएको थियो ।
काेराेना मत्थर भएसँगै एमाले चितवनको अध्यक्षमा रामप्रसाद न्यौपानेलाई चयन गरिएकाे छ । २०३४ सालमा माडीमा जन्मिएका न्यौपाने २६ वर्षदेखि एमालेको पूर्णकालीन राजनीतिमा छन् ।
कोरोनाको संक्रमण भएका जिल्ला नेता कार्यकर्ता संक्रमणमुक्त र जिल्ला इन्चार्ज देवी ज्ञवालीको पिताको मृत्युपछिको क्रियाक्रम सकिएपछि बुधबार जिल्ला नेतृत्व चयन गरिएको एमालेका एक केन्द्रीय सदस्यले जानकारी दिए । ‘अध्यक्षमा रामप्रसाद पक्का भएका छन् । घोषणा चाँहि एक बजे मात्रै गर्ने कार्यक्रम छ’, उनले भने ।
जिल्ला उपाध्यक्षमा कमलराज पाठक, सचिवमा शैलेश खनाल, सहसचिवमा चन्द्रकान्त न्यौपाने र प्रकाश ढुंगाना चयन भएका छन् । आज नै १३२ सदस्यीय जिल्ला कमिटी घोषणा हुँदैछ । जिल्ला कमिटीको आज दिउँसो १ बजे जिल्ला पार्टी कार्यालयमा सपथ ग्रहण गर्ने कार्यक्रम रहेको छ । -न्युज कारखाना
अंकारा । टर्कीका एक पुरुष कोभिडकै कारण १४ महिना आइसोलेसनमा बिताएका छन । सन् २०२० को नोभेम्बरमा पहिलो पटक कोभिड पोजेटिभ भएका उनलाई पटक पटक गरी ७८ पटक संक्रमण भएको छ ।
५६ वर्षीय मुजाफ्फर कायसन विगत एक वर्षदेखि आफ्नो घर र अस्पतालमा सीमित छन् । उनी पहिल्यकै अवस्थामा फर्किन चाहन्छन् ।
सन् २०२० को नोभेम्बरमा कोभिड भएपछि उनलाई अस्पतालमा भर्ना गरिएको थियो । त्यतिबेला उनमा कोभिडको खराब लक्षण देखिएको थियो । भाइरस उनको स्वास्थ्य प्रणालीमा नै रहेको थियो । पहिलो पटक पोजेटिभ देखिएपछि गरेका हरेक परीक्षणमा पोजेटिभ देखिएको थियो, जसका कारण उनी अस्पताल वा घरमै आइसोलेसनमा बस्न बाध्य भएका थिए ।
कायसन ल्युकेमियाका बिरामी हुन् । चिकित्सकहरुका अनुसार रोग प्रतिरोध क्षमता कमजोर भएकोले लामो समयसम्म उनको शरीररमा कोभिडको लक्षण देखिएको हो । उनको प्रतिरक्षा प्रणालीमा सुधार गर्न चकित्सकले उनलाई औषधि खान सुझाव दिँदै आएका छन् । तर, सो पक्रिया लामो र जटिल भएको बताइएको छ ।
लामो समय एक्लै बस्दा उनको सामाजिक जीवन अस्तव्यस्त बनेको छ । उनी साथीभाईसँग बसेर बोल्न पाएका छैनन् । उनले आफ्नो छोरा र नातिनातिनालाई झ्यालबाट मात्र हेर्छन् । उनकी पत्नि र कान्छा छोरा मात्र उनीसँग बस्छन् ।
मेरा प्रियजनहरुलाई छुन नपाउनुबाहेक मलाई कुनै समस्या छैन् । मेरो स्वास्थ्य समस्याका कारण खोप लगाउन पाएको छैन,’ कायसनले समाचार संस्था अनादोलुलाई भने । – एजेन्सी
काठमाडौँ । इमर्जिङ नेपाल लिमिटेडले आजदेखि सर्वसाधारणका लागि साधारण शेयर बिक्री खुला गरेको छ । कम्पनीले प्रतिकित्ता रु १०० अङ्कित मूल्यमा रु पाँच करोड ५५ लाख ६० हजार बराबरको पाँच लाख ५५ हजार ६०० कित्ता प्रारम्भिक सार्वजनिक निष्काशन (आइपिओ)को बिक्री खुला गरेको हो । कम्पनीले निष्काशन गर्ने साधारण शेयरमध्ये पाँच प्रतिशत अर्थात् २७ हजार ७८० कित्ता सामूहिक लगानी कोषका लागि छुट्याएको छ भने दुई प्रतिशत अर्थात् ११ हजार ११२ कित्ता साधारण शेयर कर्मचारीकम लागि सुरक्षित गरी बाँकी रहने पाँच लाख १६ हजार ७०८ कित्ता शेयर खरिदका लागि सर्वसाधारणले आवेदन दिन पाउने कम्पनीले जारी गरेको आह्वानपत्रमा उल्लेख छ ।
निष्काशित शेयरमा सर्वसाधारणले आगामी फागुन १ गतेसम्ममा न्यूनतम १० कित्तादेखि अधिकतम एक हजार कित्तासम्मका लागि आवेदन दिन पाउनेछन् । तोकिएको अवधिसम्म मागबमोजिम आवेदन नआए फागुन ११ गतेसम्म शेयर निष्काशन खुला रहने कम्पनीले जनाएको छ । सर्वसाधारणले नेपाल धितोपत्र बोर्डबाट सिआस्वा सुविधा प्रदान गर्न अनुमति पाएका बैंक तथा वित्तीय संस्था र तिनका शाखा कार्यालयका साथै अनलाइनमार्फत ‘मेरो शेयर’ प्रयोग गरेर शेयर खरिदका लागि आवेदन दिन सक्ने कम्पनीको धितोपत्र निष्काशन तथा बिक्री प्रबन्धक एनआइसी एशिया क्यापिटल लिमिटेडले जनाएको छ ।
राष्ट्रिय प्राथमिकताका क्षेत्रअन्तर्गतका पूर्वाधारको विकास, यातायात, सञ्चार, ऊर्जा, पर्यटन, उद्योग, स्वास्थ्य, कृषि, वित्तीय र अन्य आर्थिकरूपमा महत्व भएका योजनामा लगानी गर्ने उद्देश्य भएको कम्पनीको पूँजी संरचनाअन्तर्गत रु पाँच अर्ब अधिकृत पूँजी छ । कम्पनीको हालको जारी पूँजी रु ५५ करोड ५६ लाख बराबरको तथा चुक्ता पूँजी रु ५० करोड ४० लाख छ । विवरणपत्रमार्फत सर्वसाधारणलाई खरिदका लागि खुला गरेको शेयरको बाँडफाँटपश्चात कम्पनीको चुक्ता पूँजी रु ५५ करोड ५६ लाख पुग्नेछ । धितोपत्रको सार्वजनिक निष्काशन गर्दा क्रेडिट रेटिङ गर्नुपर्ने व्यवस्थाअनुसार रेटिङ गर्दा इक्रा नेपालले कम्पनीलाई ‘इक्रा एनपी आइआर बिबी प्लस’ ग्रेडिङ प्रदान गरेको छ । -रासस
इलाम । मुलुकमा जीविकोपार्जन गर्ने कमाई र काम नपाएपछि धेरैलाई रोजगारीको लागि बिदेसिनुपर्ने बाध्यता छ । वैदेशिक रोजगारीमा जाने धेरैले महँगो ब्याजमा ऋण लिने गरेका छन् । सुरक्षित आप्रवासन परियोजना (सामी) ले इलाम नगरपालिकाको आप्रवासन पार्श्वचित्र तयार पार्न लिएको तथ्याङ्क अनुसार ३६ प्रतिशतभन्दा बढीसम्म ब्याजमा ऋण लिएर वैदेशिक रोजगारीमा गएको पाइएको छ ।
११७ जनाले २५ देखि ३६ प्रतिशत ब्याजदरमा ऋण लिएर विदेश गएका हुन् । ३६ प्रतिशत भन्दा बढी ऋण लिएर पनि वैदेशिक रोजगारीमा जाने गरेको पाइएको सामीका कार्यक्रम संयोजक ईश्वरी तामाङले बताए । ३६ प्रतिशत भन्दा बढी ऋण लिएर तीन जना वैदेशिक रोजगारीमा गएका छन् । ‘विदेश जाने धेरैले ऋण काढेरै विदेश जाने हुन्’, तामाङले भने,‘बैङ्क वित्तीय संस्थाहरूले विदेश जानेलाई ऋण दिँदैनन्, साहु महाजनबाट हतार हतारमा ऋण लिएर विदेश जानेहरू जतिसुकै महँगो ब्याज पनि तिर्न तयार हुन्छन् ।’
सुरक्षित आप्रवासन परियोजनाले सङ्कलन गरेको तथ्याङ्क अनुसार १६५ जनाले १२ प्रतिशत भन्दा कम ब्याजमा ऋण लिएर वैदेशिक रोजगारीमा गएका छन् । १३ देखि १८ प्रतिशत ब्याजमा ऋण काढेर २८३ जना बिदेसिएका छन् । ४४१ जना १९ देखि २४ प्रतिशतसम्म ब्याजमा ऋण लिएर विदेश गएको पाइएको छ ।
रोजगारीमा जान ऋणको भार
वैदेशिक रोजगारीको लागि वित्तीय संस्थाहरूले ऋण दिँदैनन् । त्यसैले अधिकांशले साहु महाजन र आफन्तबाट ऋण लिएर विदेश जाने गरेका छन् । वित्तीय संस्थाबाट लिएको ऋण विदेश जानको लागि खर्च गरेपनि अरुनै प्रयोजन देखाएर ऋण लिने गरेको तामाङ बताउँछन् ।
इलाम नगरपालिका क्षेत्रका ९४५ जनाले ऋण या सापटी लिएर विदेश गएको तथ्याङ्क छ । त्यसमध्ये ६३४ जनाले आफन्तबाट ऋण लिएका छन् भने २६२ जना साहु महाजनबाट ऋण लिएका छन् । त्यस्तै बचत समूहबाट ३० जना, सहकारीबाट ३६ जना र बैङ्कबाट ८७ जनाले ऋण लिएर विदेश गएको तथ्याङ्क छ । ४०५ जनाले भने आफ्नै श्रोतबाट रोजगारीको लागि विदेश गएका छन् भने, १८ जनाले सम्पत्ति बेचेर रोजगारीको लागि विदेश जाने खर्च जुटाएका हुन् ।
रोजगारीमा जान लाखौँ खर्च
सामी परियोजनाको तथ्याङ्क अनुसार वैदेशिक रोजगारीका लागि धेरैजसो खाडी मुलुक गएका छन् । खाडी मुलुक पठाउन म्यानपावर कम्पनीले दश हजार रुपैयाँ भन्दा बढी रकम लिन पाउँदैनन् । तर, खाडी मुलुक जानकै लागि पनि २० गुण बढी रकम तिर्न बाध्य छन् । २४३ जनाले दुई लाख रुपैयाँ भन्दा बढी रकम खर्चेर विदेश गएको पाइएको छ । १४७ जनाले एक लाख ५१ हजार देखि दुई लाखसम्म बुझाएको पाइएको छ । ६८३ जनाले एक लाखदेखि एक लाख ५० हजारसम्म खर्चिएका छन् । ९९ जनाले ८१ हजार रुपैयाँ देखि एक लाख रुपैयाँसम्म, ७८ जनाले ५१ देखि ८० हजार रुपैयाँसम्म, ११ देखि ५० हजार रुपैयाँ खर्चेर बिदेसिएका छन् । जम्मा २१ जनाले फ्रि टिक फ्रि भिसा मार्फत रोजगारीको लागि विदेश गएका छन् ।
वैदेशिक रोजगारीको लागि बढी रकम बुझाएर गएपनि उनीहरूले बुझाएको रकमको भरपाई पाउँदैनन् । रोजगारीमा जानेबाट लाखौँ रकम असुलेपनि म्यानपावर कम्पनीले सरकारले निर्धारण गरेको रकमको मात्रै भरपाई दिने गरेका छन् । म्यानपावर कम्पनीहरूले राम्रो काम र कमाईको प्रलोभन देखाएर ठग्ने गरेको सामीका जिल्ला परियोजना संयोजक तामाङले बताए । ‘म्यानपावर कम्पनीले राम्रो काममा पठाइदिने भनेर तोकेको भन्दा धेरै रकम लिन्छन्, तर थोरै पैसा लिएको मात्रै भरपाई दिएको हुन्छ’, उनले थपे,‘कतिले भनेको काम पाउँदैनन्, तलब पनि भनेजति नपाएपछि स्वदेश फर्किन्छन्, यहाँ आएपछि आफूले बुझाएको रकम पनि उठाउन सक्दैनन् ।’ तिरेको रकमभन्दा कमको मात्रै भरपाई लिएपछि म्यान पावर कम्पनीलाई बुझाएको रकम लिन नसकेर धेरै जना ठगिने गरेको तामाङले बताए ।
धेरैजसो खाडी मुलुक
वैदेशिक रोजगारीका लागि अधिकांशको रोजाई खाडी मुलुकनै छ । चाडै भिसा लाग्ने, अर्धदक्ष जनशक्तिले पनि काम पाउने भएकाले खाडी मुलुक जानुपर्ने बाध्यता छ । खासै राम्रो कमाई नहुने भएपछि इलाम नगरपालिका क्षेत्रका धेरैजसो वैदेशिक रोजगारीको लागि खाडी मुलुकनै गएको पाइएको छ । ३१४ जना मलेसिया, २०६ जना साउदी अरब, २८२ जना दुबई, २११ जना कतार ४२ जना कुवेत, १५ जना ओमन रोजगारीको लागि गएका छन् ।
पाँच पटकभन्दा बढी रोजगारीको लागि विदेश
वैदेशिक रोजगारीमा गएर फर्किएकाहरू मुलुकमानै स्वरोजगार नहुँदा पटक पटक बिदेसिने गरेका छन् । कतिसम्म भने एकै जना व्यक्ति पाँच पटकसम्म वैदेशिक रोजगारीको लागि विदेश धाउने गरेका छन् । तथ्याङ्क अनुसार ४० जना पाँचौँ पटक र त्यस भन्दा बढी पटक रोजगारीको लागि विदेश गएको पाइएको छ । वैदेशिक रोजगारीको कमाई अनुत्पादक क्षेत्रमा लगानी गर्दा पटक पटक बिदेसिनुपर्ने बाध्यता छ । कतिपयले विदेशमा गरेको कमाई घर बनाउन, घडेरी किन्न या घरखर्चमानै सक्ने गरेका छन् । विदेशको कमाइ आम्दानी मूलक क्षेत्रमा लगानी नगर्दा पटक पटक रोजगारीको लागि विदेश जानुपर्ने अवस्था छ । सामी परियोजनाको तथ्याङ्क अनुसार चौथो पटक विदेश जानेको सङ्ख्या ३८, तेस्रो पटक जानेको सङ्ख्या १२३ जना, दोस्रो पटक विदेश जानेको सङ्ख्या, ४७२ र पहिलो पटक रोजगारीको लागि विदेश जानेको सङ्ख्या ७६६ रहेको छ ।
५० बर्षपछि पनि रोजगारीको लागि विदेश
कतिपय उमेर ढल्किँदै जाँदा समेत विदेशी भूमिमा कमाउन जान्छन् । पटक पटक विदेश जानेहरू ५० वर्ष काटिसक्दा समेत विदेश जाने गरेको पाइएको छ । इलाम नगरपालिका क्षेत्रका एक हजार ४९३ वैदेशिक रोजगारीमा गएका छन् । ती मध्ये २१ जना ५० वर्षभन्दा बढी उमेरका छन् । यस्तै २२८ जना ४१ देखि ५० वर्ष उमेरका छन् । ३१ देखि ४० वर्षका ६३१ जना, २१ देखि ३० वर्ष उमेरका ६३१ र १८ देखि २० वर्षका चार जना रहेको सामी परियोजनाको तथ्याङ्क छ ।
सुनसरीको कोशी गाउँपालिकामा मानव अधिकार समूह पुनरगठन भएको छ । अनौपचारिक क्षेत्र सेवा केन्द्र (इन्सेक) विराटनगरको आयोजनामा शिक्षा, स्वास्थ्य, खाध्य तथा आबाश अधिकारका लागि समुदायलाई सचेत पार्दै जिम्मेबार निकायलाई जवाफदेहि बनाउने परियोजना अन्तरगत राजकुमार शर्माको अध्यक्षतामा मानव अधिकार समूह कोशी पूनरगठन भएको हो ।
समूहको उपाध्यक्षमा श्यामकुमार खंग, सचिवमा विष्णुकुमार यादव, सहसचिवमा रिना मण्डल र कोषाध्यक्षमा चन्द्रकला नेपाल चयन हुनुभएको छ । त्यसैगरी सदस्यहरुमा गिता पौडैल, अन्जुम खातुन, ब्रजेश कुमार यादव, मुस्ताक आलम र सल्लाहकारमा निर्वतमान अध्यक्ष अनिता उराँव र पत्रकार पनव रौनीयार लगयातका चयन भएका छन् । मानव अधिकार समूहको बैठकले कोशीमा रहेको वडाहरुको समस्या पहिचानका लागि समूहले अनुगमन गर्ने, गाउँमा सुकुम्बासी सम्बन्धी लागत संकलनमा गाउँपालिकालाई सहजिकरण गरिदिने, गाउँपालिकामा शिक्षा, स्वास्थ्य, खाध्य र आबाश अधिकारको अवस्था विशलेषण सहित ज्ञापन पत्र बुझाउने, सार्वजनिक सुनुवाई कार्यक्रम गर्ने र समूहलाई थप सकृय पार्ने निर्णय गरेको छ । बैठकमा इन्सेकका जिल्ला प्रतिनिधि तथा सहजकर्ता जयकृष्ण यादवले सहजिकरण गर्नुभएको थियो । मानव अधिकार समूहले शिक्षा, स्वास्थ्य, खाद्य र आवासको अधिकारमाथि पहँुचका लागि मागदावी गर्न नागरिकलाई क्षमता वृद्धि गर्ने र अधिकारहरुको परिपुर्तिको लागि स्थानीय सरकार तथा सम्बन्धित निकायलाई जबाफदेही बनाउने भूमिका निर्वाह गर्ने जनाएको छ ।
सुनसरी सदरमुकाम इनरुवामा नेपाल कम्युनिष्ट पार्टी (माओवादी केन्द्र ) इनरुवा नगर कमिटिको पदभार ग्रहण तथा प्रथम पूर्ण बैठक मंगलबार सम्पन्न भएको छ । पार्टीको नगर कमिटि पदाधिकारीहरु अध्यक्ष तोया गिरी पोदार,उपाध्यक्ष शंकर सापकोटा ,झबरु चौधरी ,सूर्यनारायण यादव, सचीव मुख्तार आलम, सह सचिव ध्रुव नारायण पण्डित र कोषाध्यक्ष बिमला पोख्रेल सहित कार्यसमितिलाई प्रमाण पत्र सहित पदभार गराएको पार्टीले जनाएको छ । पार्टीका नेताहरु निर्मल बराल शिव डांगी, पूर्व सभासद अनिता परियार, केन्द्रिय सदस्य सुरेन्द्र मेहता, पत्रकार राजन केडी सहितका स्थानीय, प्रदेश र केन्द्रिय नेताहरुको उपस्थितीमा पदभार ग्रहण गराएको पार्टीका पूर्व नगर अध्यक्ष ओके दाहालले जानकारी दिनुभयो । पदभार ग्रहण कार्यक्रममा निर्वाचितहरुलाई आगामी दिनमा विगतका दिनमा भएका कमजोरी नियाल्दै, सच्याउदै, विगतका राम्रा पक्षलाई अनुशरण गर्दै अघि बढ्नुहुन सुझाव सहित बधाई दिएको थियो । अथितिहरु सबैलाई आआफ्नो जिम्मेवारी इमानदारी, कर्तव्यनिष्ठ बनेर देश, नगर र जनताको हितमा लाग्न आग्रह सहित सफल कार्यकालको शुभकामना दिनुभएको थियो ।
काठमाडौं । राष्ट्रिय प्रजातन्त्र पार्टीका निवर्तमान अध्यक्ष कमल थापाले पार्टी परित्यागको घोषणा गरेका छन ।
अध्यक्ष राजेन्द्र लिङदेनले आफनो मागको सम्बोधन नगरेको भन्दै असन्तुष्ट रहेका थापाले पार्टी परित्यागको घोषणा गरेको केन्द्रिय सदस्य अभिषेक थापाले जानकारी दिए । अभिषेकका अनुसार आज गृहनगर हेटौंडामा आयोजित एक कार्यक्रममा उनले पार्टी परित्याग गरेको घोषणा गरेका हुन् ।
काठमाडौं । विन्टर ओलम्पिक २०२२ को चौथो दिनसम्म आइपुग्दा आयोजक चीन र स्विडेनले सर्वाधिक तीन स्वर्ण पदक जितेका छन् । बेइजिङमा जारी शीतकालिन ओलम्पिकमा चीनले ३ स्वर्ण र २ रजत पदक जित्दा जम्मा पाँच पदक हात पारेको छ ।
स्विडेनले भने तीन स्वर्ण जितेको छ । उसले रजत र कास्य भने जित्न सकेको छैन । यता, रसियन ओलम्पिक कमिटी (आरओसी), नेदरल्याण्ड, जर्मनी, नर्वे र स्लोभेनियाले समान २ स्वर्ण पदक जितेका छन् ।
यस्तै, इटाली, अष्ट्रिया, क्यानडा, जापान, स्विट्जरल्याण्ड, अष्ट्रेलिया र न्युजिल्यान्डले समान एक स्वर्ण पदक हात पारेका छन् । हालसम्म १९ देशले पदक तालिकामा खाता खेलेका छन् । २० फेब्रुअरीसम्म चल्ने प्रतियोगितामा तीन हजार भन्दा बढी खेलाडीको सहभागीता रहेको छ भने ९३ देशले सहभागीता जनाएका छन् ।
काठमाडौँ । नेत्रविक्रम चन्द नेतृत्वको नेपाल कम्युनिष्ट पार्टीको जुम्ला जिल्ला समिति नेपाल कम्युनिष्ट पार्टी (माओवादी केन्द्र) मा समाहित भएको छ । माओवादी केन्द्रका अध्यक्ष पुष्पकमल दाहाल ‘प्रचण्ड’ निवास खुमलटारमा आज आयोजित एक कार्यक्रमबीच जिल्ला इन्चार्ज चन्द्रवीर तिरुवासहित जिल्ला सेक्रेटरी, सह–सेक्रेटरीलगायत दुई दर्जनभन्दा बढी नेता तथा कार्यकर्ता माओवादी केन्द्रमा प्रवेश गरेका हुन् ।
सो अवसरमा अध्यक्ष दाहालले ढिलो छिटो माओवादी क्रान्तिका सहयात्री एक ठाउँमा हुनुको कुनै विकल्प नरहेको बताए । परिवर्तनबाट प्राप्त उपलब्धिलाई बचाउन र नेपाली जनताको भाग्य भविष्यका लागि अझै लड्दै जान पनि माओवादी शक्तिहरु एकजुट हुन आवश्यक भएको उनको भनाइ थियो ।
“माओवादीलाई देशभित्रका र देशबाहिरका प्रतिक्रियावादीहरु कसरी घेरा हालेर सखाप पार्न सकिन्छ भनेर लागिरहेका छन्,” उनले भने, “हामी यति ठूलो परिवर्तनका वाहक विघटन वा विभाजन तिर जाँदा प्रतिक्रियावादीलाई धेरै ठूलो फाइदा हुन्छ र जनतालाई धेरै ठूलो घाटा हुन्छ ।” उनले अहिले विस्तारै विभाजनका घाउहरु बिर्सिंदै र देशको वस्तुगत अवस्थालाई मनन गर्दै माओवादी एक ठाउँमा केन्द्रित हुँदै गएको बताए ।
उनले भने, “जनतासँग जोडिएर र माओवादी आन्दोलनलाई केन्द्रित गरेर हामी विजयी हुन्छौँ । हामीलाई कसैले परास्त गर्न सक्दैन ।” अध्यक्ष दाहालले नवप्रवेशी नेता तथा कार्यकर्ताहरुलाई पार्टीमा उचित जिम्मेवारी दिइने पनि बताए ।
इन्चार्ज तिरुवाले नेपाली कम्युनिष्ट आन्दोलनलाई अगाडि बढाउन अध्यक्ष दाहाल नै सक्षम रहेको उल्लेख गर्दै अन्य कोहीले रहर गरेर नहुने बताएको अध्यक्ष दाहालको सचिवालयले जनाएको छ । अबको समाजवादी क्रान्तिका लागि अध्यक्ष नेतृत्वको पार्टीमा आफूहरु घर फर्किएको उनको भनाइ थियो ।-रासस
काठमाडौं । फिनिसर शरद भेषावकरले आईसीसी टी-२० विश्वकपको ग्लोबल छनोटबाट नेपाली राष्ट्रिय क्रिकेट टोलीमा ‘कमब्याक’ गर्दैछन् । यहि अवसरमा शरद नेपाली टोलीलाई दोस्रो पटक विश्वकपमा छनोट गराउने योजनामा छन् । उनकै शब्दमा भन्ने हो भने,‘दोस्रो पटक विश्वकप खेल्ने विषयमा टोली विश्वस्त छ ।’
यसअघि नेपाली टोलीले सन् २०१४ मा ढाकामा विश्वकप खेलेको थियो । त्यसयता, टोलीले त्यतिको ठुलो उपलब्धी हासिल गर्न सकेकाे छैन । तत्कालिन कप्तान पारस खड्काले अन्तरराष्ट्रिय क्रिकेटबाट सन्यास लिइसकेका छन् । यस पटक टोलीको कप्तानी गर्दैछन् युवा लेग स्पिनर सन्दीप लामिछाने ।
यता, प्रशिक्षक समेत उहि पुबुदु दासानायके नै छन् । उनकै प्रशिक्षणले तत्कालिन समयमा नेपालले विश्वकप खेलेको थियो । सोहि टोलीमा रहेका ज्ञानेन्द्र मल्ल र शरद हाल टोलीकाे साथ छन् ।
प्रशिक्षक पुबुदुले १६ सदस्यीय खेलाडी यस अघिनै घोषणा गरिसकेका छन् । अनुभवी खेलाडी शरद प्रतियोगिताको दुई खेलमा उत्कृष्ट प्रदर्शन गर्दै नतिजा हात पार्न सके विश्वकपमा पुग्ने आशावादी छन् । ‘दोस्रो पटक विश्वकप खेल्ने विषयमा टोली विश्वस्त छ । दुई खेलमा हामीले हाम्रो उत्कृष्ट प्रदर्शन दियौं भने पक्कै छनोट हुनेछौं ।’ ३३ वर्षीय दाया हाते ब्याटर शरद भन्छन् । ‘मलाई लाग्छ, यो खेल कमब्याकभन्दा पनि अर्को एउटा खेल खेलेको जस्तो लागेको छ । टिम पनि सन्तुलित छ । सबै खेलाडीहरू युवा छन् । सबै तयार छन् ।’
नेपालले आगामी अक्टोबर-नोभेम्बरमा अष्ट्रेलियामा हुने विश्वकपका लागि ६ फागुनदेखि ओमानमा ग्लोबल छनोट खेल्दैछ । ग्लोबल छनोटमा आठ टोलीले प्रतिस्पर्धा गर्ने छन् । आठ टोलीलाई दुई समूहमा विभाजन गरिएको छ । समूह ‘ए’ मा नेपालसहित क्यानडा, ओमान र फिलिपिन्स छन् । समूह ‘बी’ मा बहराइन, जर्मनी, आयरल्यान्ड र यूएई छन् ।
नेपालले ६ फागुनमा आयोजक ओमानसँग, ७ फागुनमा फिलिपिन्ससग र ९ फागुनमा क्यानडाविरुद्ध खेल्नेछ । दुवै समूहको शीर्ष दुई टोलीले सेमिफाइनलमा प्रवेश गर्ने छन् । १२ फागुनमा हुने फाइनल खेलका दुई प्रतिस्पर्धी टोली विश्वकपका लागि छनोट हुनेछ ।
ग्लोबल छनोटअघि नेपालले २८ माघबाट तीन देश सम्मिलित टी-२० शृंखला खेल्दैछ । जसअन्तर्गत २८ माघमा ओमान, २९ माघमा संयुक्त अरब इमिरेट्स् (यूएई) र २ फागुनमा आयरल्यान्डविरुद्ध प्रतिस्पर्धा गर्नेछ ।
प्रशिक्षक दासानायके भन्छन- टाेलीकाे तयारी याेजनाअनुसार नै भइरहेकाे छ
नेपाली टोलीका प्रशिक्षक पुबुदु दासानायके नेपाली टोलीको तयारी योजनाबद्ध तरिकाले भएको र टोली विश्वकप छनोटका लागि आशावादी रहेको बताउँछन् । ‘अभ्यास योजनावद्द रुपमा भईरहेको छ । सुरुमा केहि चुनौतीको सामना गर्नुपर्याे । अहिले सबै ठिक छ । टोलीको तयारी सबै राम्रो छ । मैले चाहेको जस्तै भएको छ ।’ दोस्रो पटक नेपाली टोली हेरिरहेका पुबुदु भन्छन् ।
पावर हिटर लोकेश बम र अलराउन्डर विवेक यादवले पहिलो पटक टोलीमा स्थान बनाएका छन् । पछिल्ला वर्षहरूमा नेपालले बलिङमा राम्रो प्रदर्शन दिँदै आए पनि ब्याटिङ सुखद् रहन सकेको छैन । तर, यसपटक टोलीले युवा खेलाडीको साथमा राम्रो प्रदर्शन दिँदै आएको छ । कुशल भुर्तेल, दीपेन्द्र सिंह ऐरी, आसिफ शेख जस्ता खेलाडी यसका उदाहरण हुन् ।
टोलीका कप्तान सन्दीप सन् २०१४ मा पूर्व कप्तान पारसले खडा गरेको विरासतलाई अगाडि बढाउने जिम्मेवारी आफूसहित टोलीलाई रहेको बताउँछन् । ‘पारस दाईले आफ्नो नेतृत्वमा खेलाएर एउटा विरासत खडा गरेर छोड्नु भएको छ । त्यो विरासतलाई अगाडि लिएर जाने जिम्मेवारी मेरो मात्रै हैन, सबै टिममाथि छ । त्यो सन् २०१४ को विश्वकप खेलेको क्षणलाई फेरि फिर्ता ल्याएर फेरि विश्वकप खेल्ने मेरो मात्रै हैन पूरा नेपाली जनताको चाहना छ ।’ पहिलो पटक राष्ट्रिय टोलीको कप्तानी समाल्न लागेका २१ वर्षीय सन्दीप भन्छन् ।