पर्सा प्रहरीद्वारा २२ लाख ५० हजार अवैध रकम सहित २ जना पक्राउ – Nagarikabhiyan : National News

पर्सा प्रहरीद्वारा २२ लाख ५० हजार अवैध रकम सहित २ जना पक्राउ

वीरगञ्ज । पर्सा जिल्लामा अवैध हुण्डी करोबार बढ्दै गएको छ । प्रहरीले श्रोत नखुलेको २२ लाख ५० हजार रुपैयाँ सहित २ हुण्डी करोबारीलाई पक्राउ गरेको छ ।

पक्राउ पर्नेहरुमा वीरगञ्ज महानगरपालिका वडा नम्बर १६ नगवाका ३४ वर्षीय बिकाश साह र वीरगञ्ज महानगरपालिका वडा नम्बर १८ ईनर्वा मनियारी निवासी १९ वर्षीय सुवास कुमार साह छन् ।

मंगलबार दिउँसो जिल्ला प्रहरी कार्यालय पर्साबाट खटिएको टोलीले वीरगञ्जको घण्टाघरस्थित सडकखण्डबाट उनीहरुलाई नियन्त्रणमा लिई आज सार्वजनिक गरेको हो ।

प्रहरीले उनीहरुमाथि शंका लागि चेकजाँच गर्ने क्रममा बीआर–५–एई ९३४३ नम्बरको भारतीय स्कुटरमा पछाडी बस्ने सुवास कुमार साहले बोकेको झोला भित्र १ हजार, ५ सय तथा १ सय दरका २२ लाख ५० हजार नेपाली रुपैयाँ फेला परेको जिल्ला प्रहरी कार्यालय पर्साका प्रहरी नायब उपरीक्षक दिपक गिरीले जानकारी दिए।

साथै अभियुक्तहरुले प्रयोग गरेको मोबाईल २ थान समेत बरामद गरेको उनले बताए । आफूसंग रहेको रकमको श्रोत खुलाउन नसक्दा उनीहरुलाई नियन्त्रणमा लिई बैंक तथा वित्तीय संस्था सम्बन्धी ऐन, २०७३ बमोजिमको कसूरमा अनुसन्धान भैरहेको पर्साका प्रहरी प्रवक्ता एवम डिएसपी गिरीले बताए ।