कोरोना पूर्णरुपमा नियन्त्रण नहुँदासम्म निषेधाज्ञा हट्दैन : गृह मन्त्रालय
२८ जेष्ठ २०७८, शुक्रबार ११:२८
काठमाडौं । गृह मन्त्रालयका प्रवक्ता जनकराज दाहालले तत्काल सवारीसाधन नचल्ने बताउनुभएको छ ।
देशका ७५ जिल्लामा जारी निषेधाज्ञाको मोडालिटी असार १ देखि हेरफेर गर्ने तयारी भए पनि सवारीसाधनलाई भने तत्काल खुला नगरिने उहाँले बताउनुभयो । अहिलेको समय कृषि र खेतीपातीको समय भएकोले त्यसैलाई मध्यनजर राखी निषेधाज्ञाको मोडालिटी बनाइने प्रवक्ता दाहालको भनाइ छ ।
सवारीसाधन सञ्चालन गर्ने विषयमा मन्त्रालयले अहिलेसम्म केही नसोचेको उहाँले जानकारी दिनुभयो । सवारीसाधन सञ्चालन गर्दा झनै संक्रमण बढ्ने भएकाले अहिले सवारीसाधन सञ्चालन गर्ने कुनै तयारी नभएको उहाँले प्रष्ट पार्नुभयो ।
आर्थिक गतिविधि सञ्चालन गर्न सहजीकरण गर्ने भन्ने कुरा आइरहँदा प्रवक्ता दाहालले शहर बजारमा व्यापार–व्यवसाय पनि अहिले नै सञ्चालन नहुने बताउनुभयो ।
अहिले पनि समय मिलाएर अत्यावश्यक सामग्री खरिदविक्रीमा सहज बनाइएको बताउदै उहाँले व्यापार–व्यवसाय पूर्णरुपमा खुला गर्ने अवस्था बनिनसकेको बताउनुभयो । निषेधाज्ञा जारी भएकाले संख्यात्मक हिसावले थोरै कोरोना संक्रमण घटे पनि उल्लेख्य घटिसकेको छैन । जनस्वास्थ्य विज्ञले असारमा झन् बढी कोरोना संक्रमण फैलिने अनुमान गरेकाले निषेधाज्ञा हटाइहाल्ने अवस्था नरहेको प्रवक्ता दाहालको भनाइ छ ।
अघिल्लो वर्षको जस्तो पूर्ण लकडाउन नभएकोले जनजीवन पूर्णरुपमा प्रभावित भएको अवस्था नभएको उहाँको दाबी छ ।
निषेधाज्ञाले राम्रो प्रभाव पारेको मन्त्रालयको निष्कर्ष रहेको बताउदै उहाँले कोरोना पुर्णरुपमा नियन्त्रण नहुँदासम्म निषेधाज्ञा नहटाउने कि भन्ने बारे समेत छलफल भइरहेको जानकारी दिनुभएको छ ।
जनता सामाचार बाट

फेसबुकबाट तपाईको प्रतिक्रिया