पूँजीबजारका संरचना प्रदेशस्तरमा विस्तार गर्न माग
११ पुष २०७८, आईतवार १२:०९
विराटनगर । पूँजी बजारका संरचनाहरूलाई प्रदेशस्तरसम्म विस्तार गर्न माग गरिएको छ ।
शनिबार विराटनगरमा आयोजित प्रदेश स्तरीय पूँजीबजार सचेतना कार्यक्रममा सहभागिहरूले धितोपत्र बोर्ड नेप्से, मर्चेन्ट बैंक लगायतका संरचना प्रदेशस्तरमा पनि विस्तार गर्न सरोकारवालाहरूले माग गरेका हुन् । कार्यक्रममा नेपाल उद्योग परिसंघ प्रदेश–१ का अध्यक्ष भीम घिमिरेले पूँजी निजी क्षेत्रले सिर्जना गर्ने बताए । उनले प्रदेश–१ मा पूँजी सृजना गर्ने पर्याप्त आधारहरू रहेको बताए । काठमाडौं बाहिर पूँजी उत्पादन कार्यमा तदारुकता नदेखाएको उनको गुनासो छ । उहाँले सहकारीको लगानीलाई संरक्षण गर्न सके पूँजीको विस्तार संगठित रुपमा अघि बढ्ने बताए ।
नेपाल उद्योग बाणिज्य महासंघ प्रदेश–१ का सल्लाहकार अविनाश बोहराले नेपालको पूँजीबजारको साइज ३६ खर्बको रहेको जानकारी दिए । उनले नियमनकारी निकायको पारदर्शिताको अभावले पूँजीबजार धेरै अस्थिर रहेको बताए । उनले देश संघीयतामा गए पनि पूँजीबजार अझै काठमाडौं केन्द्रित रहेको गुनासो गरे ।
कार्यक्रममा नेपाल धितोपत्र वोर्डका कार्यकारी निर्देशक निरज गिरीले पूँजी बजारको साइज बढे पनि नेपाली शेयर बजारमा बैंक तथा वित्तीय संस्थाको बाहुल्यता रहेको बताए । उनले नेपालको शेयर बजारमा उत्पादनमूलक क्षेत्रलाई ल्याउन उपयुक्त नीतिगत व्यवस्था गर्नु आवश्यक रहेको धारणा राखे ।
कार्यक्रममा प्रदेश–१ का मुख्यमन्त्री राजेन्द्र राईले राज्यको निती पूँजीबजारमैत्री रहेको बताउनुभयो । उनले ३ खम्बे अर्थनितीले पनि निजी क्षेत्र र पूँजीबजारलाई सँगै लिएर जाने स्पष्ट पारेको बताए । उनले नेपालको आर्थिक अवस्थालाई हेर्दा पूँजीबजारको भूमिका महत्वपूर्ण रहेको स्पष्ट पारे । आर्थिक पत्रकार संघ र नेपाल मर्चेन्ट बैंकर एशोसियसनले संयुक्त रुपमा आयोजना गरेको कार्यक्रममा प्रदेश १ का पूँजीबजारमा क्रियाशिल लगानीकर्ताहरू, उद्योगी व्यवसायी, पत्रकारलगायतको सहभागिता थियो ।

फेसबुकबाट तपाईको प्रतिक्रिया