जितिया पर्व आजबाट विधिवत रुपमा सुरु
११ आश्विन २०७८, सोमबार १४:५८
देवानगंज । मिथिलाञ्चलका विवाहित हिन्दु नारीहरुले मनाउने पबित्र पर्व जितिया आजबाट विधिवत रुपमा सुरु भएको छ । यस पर्व विवाहित हिन्दु नारीहरुले पति तथा सन्तानको सुख, शान्ति र लामो आयुको कामना गर्दै मनाउने गर्छन । मिथिलाञ्चल क्षेत्रमा लोकप्रिय रहेको जितिया पर्व प्रतिवर्ष असोज कृष्णपक्ष सप्तमीदेखि नवमी तिथिसम्म मनाईने परम्परा रहि आएको छ ।
पर्वको पहिलो दिन सप्तमी तिथीमा ‘नहा, खा’ (नुहाएर खानु) विधिबाट पर्व सुरु भएको हो । ब्रतालु नारीहरुले नदी, पोखरी तथा जलासयमा स्नान गरी घिरौलाको पातमा पिना, तेल र सिन्दुर भगवान जितमाहनको पुजा गर्ने गर्छन। पूजापछि कोदोको रोटी, नुनीको साग र माछा खाने चलन रहिआएको छ । जसलाई ‘माछ मरुवा’ पनि भन्ने गरिन्छ ।
जितियाको दोस्रो दिन अष्ठमीतिथिमा ब्रतालुहरु २४ घण्टाको लामो निराहार उपवास बसेर भगवान जितमाहनको कथा सुन्ने गरिन्छ भने अन्तिम दिन नवमी तिथिमा पुनः नदि, पोखरी तथा जलासयमा स्नान गरी घरमा आएर चौका लगाई चिउरा, दही तथा सखरको प्रसाद अर्घ दिएर ब्रत समाप्त भएको मानिन्छ ।

फेसबुकबाट तपाईको प्रतिक्रिया