बाबा रामदेव च्यानलहरूमा देखिएको घरमै अक्सिजन बनाउने उपायहरू भ्रामक र WHO सुझाव विपरीत – Nagarikabhiyan : National News

बाबा रामदेव च्यानलहरूमा देखिएको घरमै अक्सिजन बनाउने उपायहरू भ्रामक र WHO सुझाव विपरीत

बीबीसी ।  भारतमा अक्सिजन उपचारको आवश्यकता परेकाहरू औषधिका विभिन्न उपाय अपनाउँदै छन् । जसमा भारतका सबभन्दा प्रख्यात योग गुरु बाबा रामदेव न्यूज च्यानलहरूमा आइरहन्छन् र उनले आफ्नो यूट्युब च्यानलमार्फत पनि घरमै अक्सिजन स्तर बढाउने उपायहरू सुझाइरहन्छन्
।

शरीरमा अक्सिजनको मात्रा बढाउने घरेलु उपायका नाममा उनीहरू गलत उपचार अपनाउँदैछन् । तर त्यसले कोरोनाभाइरस बिमारीलाई सघाउने कुनै प्रमाण छैन । योगगुरुका सुझाव डब्लुएचओको सुझाव विपरीत छ ।

योग गुरुबाट जनता यसरी ठगिए

भिडिओमा औँलामा अक्सिजन स्तर नाप्ने डिभाइस राखेका उनी भन्छन्, “देशभरि अक्सिजनबारे कोकोहोलो छ, तर म तपाईँलाई जादु देखाउँछु।” सास रोकेर बस्दा उनको रगतमा अक्सिजनको मात्रा सुरक्षित स्तरभन्दा तल खसेको देखिन्छ। त्यसपछि उनी भन्छन् ‘२० सेकेन्डमा अक्सिजनको मात्रा तल झर्‍यो, अब दुई पटक लामो सास फेर्नुहोस् र जीउमा प्रशस्त अक्सिजन लिनुहोस्, यो (वातावरणमा) प्रशस्त उपलब्ध छ।’

WHO का अनुसार  

योग गर्नु सामान्यतया स्वास्थ्यको निम्ति राम्रो मानिए पनि कोभिडजस्तो रोगका कारण अक्सिजनको मात्रा शरीरमा घटेको छ भने त्यसका निम्ति मेडिकल अक्सिजन नै प्रयोग गर्न विश्व स्वास्थ्य सङ्गठनले सुझाव दिएको छ।

“यदि अक्सिजनको स्तर न्यून छ, लामो समयदेखि न्यून छ, र यदि त्यसको उपचार गरिएन भने शरीरका कोषहरू आफसेआफ काम गर्न बन्द गर्न थाल्छन्। यस्तो बेलामा जीवनरक्षक उपचार भनेको मेडिकल अक्सिजन दिलाउनु नै हो,” डब्लुएचओकी डा. ज्यानेट डियाजले भनिन्।