व्यापक बन्दै भारतसँगको सीमामा तारबार लगाउने माग , साझा पार्टीले दियो यस्तो सुझाव
२ जेष्ठ २०७७, शुक्रबार १३:४८
काठमाडौं । साझा पार्टीले भारतसँगको सीमामा तारबार लगाउन सरकारसँग माग गरेको छ । शुक्रबार (आज) विज्ञप्ति निकाल्दै साझाले नेपाल भारत सीमाका निश्चित नाकाहरू मात्रै अभिलेखीकरणको व्यवस्थासहित खुला गर्न माग गरेको छ ।
यसबाहेकका अन्य सबै भागमा तारबार लगाउन माग साझाले भनेको छ । नेपाल भारतको सीमालाई छुट्याउने धेरै दस्तावेजहरुकोसमेत बेवास्ता गर्दै भारतले नेपाली भूमि मिचेको साझाले निष्कर्ष निकालेको छ ।
“भारतले ऐतिहासिक दस्तावेज तथा नक्साहरूले प्रमाणित गरेको नेपाल भारत सीमालाई समेत बेवास्ता गर्दै लिम्पियाधुरा, लिपुलेक र कालापानी क्षेत्रमा खुल्लमखुल्ला नेपाली भूभाग अतिक्रमण गरेको छ । भारतले भर्खरै लिपुलेक भएर चीनको मानसरोवर जान खोलेको सडक त्यसैको चरम उत्कर्ष हो भन्ने हाम्रो ठहर छ ।” साझाका प्रवक्ता डा. सूर्यराज आचार्यद्वारा जारी विज्ञप्तिमा भनिएको छ ।
साझाले सीमा विवादका विषयमा सरकारलाई भारतसँग कूटनीतिक र राजनीतिक तहमा वार्ता गर्नसमेत आग्रह गरेको छ । यस्तै दुईपक्षीय वार्ता गर्न ढिला तथा हुने अवस्था आए एकतर्फी रुपमा तारबार लगाउन पहल गर्नुपर्ने साझाले भनेको छ । यस्तै सीमा विवादमा प्रमुख दलहरूको संस्थागत रूपमा ध्यान नपुगेको र उक्त विषयमा राष्ट्रिय सहमति कायम गर्न पनि सरकारले पहल गर्नुपर्ने साझाले बुझाई छ ।

फेसबुकबाट तपाईको प्रतिक्रिया