साना किसानको वार्षिक साधारण सभा सम्पन्न
२५ पुष २०७७, शनिबार १४:५७
इनरुवा । सुनसरीको भोक्राहा नरसिंह गाउँपालिका–१ मा किसानहरुको सकृयतामा निर्माण भएको लालीगुराँस साना किसान कृषि सहकारी संस्था लिमिटेडको प्रथम वार्षिक साधारण सभा सम्पन्न भएको छ ।
संस्थाले आफनो वार्षिक आयब्यय सार्वजनिक गर्दै अगामी वर्षको योजना तथा कार्यक्रम पारित गरी साधारण सभा सम्पन्न गरेको हो । संस्थाले गरेको ३२ लाख २७ हजार चार सय ८६ रुपियाँको आयब्यय विवरण सार्वजनिक गर्दै एक वर्षमा १३ हजार चार सय ७४ रुपियाँ खुद मुनाफा गरेको साधारण सभामा सार्वजनिक गरेको छ । 
संस्थाका अध्यक्ष हिरालाल मेहताको अध्यक्षतमा सम्पन्न भएको साधारण सभामा अतिथिहरुले कृषि र किसानको आवश्यकता पूर्ती गर्न सहकारीले योगदान गर्ने बताएका थिए । अतिथिहरुले सहकारीबाट बचत र ऋणका साथै कृषि क्षेत्रमा योगदान गर्ने, स्थानीयलाई संगठित गर्ने, समुह कार्यमा मदत गर्ने भएकाले सहकारीको मूल्य मान्यता अनुसार काम गर्न आग्रह गर्दै सभाको सफलताको शुभकामना दिएका थिए ।
कार्यक्रममा भोक्राहा नरसिंह गाउँपालिका उपाध्यक्ष पुनम मेहताले संस्थाले छोटो समयमा धेरैलाई संगठित गरेको र त्यसमा अधिकांश महिलाको सहभागिता भएकाले संस्थाको प्रंशसा गर्नुभयो ।
त्यसैगरी नेपाली कांग्रेस भोक्राहा नरसिंहका सभापति युवराज दाहालले सहकारी मार्फत एकीकृत गर्न सक्ने संस्था भएकोले सबैले एक जुट भएर सहकारीलाई जनमैत्री बनाउन आवश्यक रहेको बताउनुभयो । दाहालले सहकारी एक अर्कालाई जोडनुको साथै साना साना पूँजीलाई एकीकृत गर्ने भएकाले त्यसको विकास र बिस्तारमा लाग्न सहकारीलाई आग्रह गर्नुयभो । सहकारी सामाजिक परिर्वतन गर्ने सम्वाहकको रुपमा रहेकाले यसमा सबैको सहभागिता आवश्यक रहेको बताउनुभयो । 
त्यसैगरी कार्यक्रममा नेकपा भोक्राहा नरसिंह गाउँ कमिटिका सचिव रामकुमार मेहताले पालिकामा नमुना सहकारीको स्थापना गर्नुपर्नेमा जोड दिनुभयो । मेहताले अरु सहकारीको जस्तो कागज र झोलामा सिमित नपारी ब्यवहारिक रुपमा सिद्धान्त अनुसार काम गरेर गाउँको नमुना सहकारी बनाउन आग्रह गर्नुभयो । उहाँले सहकारीको नाममा धेरै ठाउँमा बढेको बिकृतिबाट पाठ सिकेर असल कार्य गर्न र सहकारीलाई दिगोपना दिन आग्रह गर्नुभयो ।
कार्यक्रममा महिला, बुद्धिजिवी, नागरिक समाज, युवा, शिक्षक मधुलाल मेहता, दीप नारायण मेहता, मनोज कुमार मेहता, श्याम प्रसाद दाहाल, मानबहादुर राउत, उमेश मेहता, रामपुकार मेहता, लक्ष्मण मेहता, कर्मचारी सीताराम मेहता, रामउदगार मेहता लगायतको सहभागिता रहेको थियो ।

फेसबुकबाट तपाईको प्रतिक्रिया