दाङमा सर्पको टोकाइबाट एक जनाको मृत्यु‚ राप्तीमा बगेका एक जनाको शव फेला
८ श्रावण २०८०, सोमबार २१:४३
दाङ :दाङमा सर्पको टोकाइबाट एक जनाको मृत्यु भएको छ भने एक जना नदीमा बगेर बेपत्ता भएका एक जनाको शव फेला परेको छ।
सल्यान बागचौर नगरपालिका(४ पेदीखोला घर भई दाङको शान्तिनगर गाउँपालिका(७ मामाघरमा आएका १६ वर्षका मनोज वलीको मृत्यु भएको हो। सोमबार राति १ बजेतिर उनलाई सर्पले टोकेको थियो।
सर्पको टोकाइले सिकिस्त भएका उनको राप्ती स्वास्थ्य विज्ञान प्रतिष्ठान घोराहीमा उपचारका क्रममा मृत्यु भएको इलाका प्रहरी कार्यालय तुलसीपुरका प्रमुख डिएसपी पुष्पराज मल्ले जानकारी दिए। राप्ती प्रादेशिक अस्पताल तुलसीपुरमा सामान्य उपचारपछि थप उपचारका लागि प्रतिष्ठानमा लगिएको थियो।
राप्ती नदीमा बगेर बेपत्ता भएका लमही नगरपालिका(९ कोल्तरानिवासी ५२ वर्षका रामलाल कुमाल मृत अवस्थामा भेटिएका छन्। लमही नगरपालिका(९ अमिलियाको राप्ती घाटमा भैंसी चराउन गएका मानिसले देखेर प्रहरीलाई खबर गरेका थिए।
घटनास्थलमा इलाका प्रहरी कार्यालय अमिलियाको टोली पुगेको लमही नगरपालिकाका वडाध्यक्ष भेषबहादुर केसीले जानकारी दिए। साउन ३ गते बुधबार राजपुर गाउँपालिका(७ सिक्टाबाट काम सकेर अपराह्न घर फर्किने समयमा उनी राप्ती नदीमा बगेर बेपत्ता भएका थिए।
बेपत्ता भएका कुमालको स्थानीय र सुरक्षाकर्मीले खोजी गरे पनि फेला पर्न सकेका थिएनन्।

फेसबुकबाट तपाईको प्रतिक्रिया