आँसुले भिजेको देवानगञ्ज: पञ्चतत्वमा विलीन भए रवीन्द्र , देवानगञ्ज पुरै शोकमा – Nagarikabhiyan : National News

आँसुले भिजेको देवानगञ्ज: पञ्चतत्वमा विलीन भए रवीन्द्र , देवानगञ्ज पुरै शोकमा

देवानगञ्ज । आकाशमा गुञ्जिएको नेपाली सेनाको हेलिकप्टरको भारी आवाजसँगै देवानगञ्ज गाउँपालिकाको धड्कन एकाएक थामिएझैँ भयो। देवानगञ्ज घटनामा गोली लागेर सदाका लागि अस्ताएका युवा रविन्द्र मेहताको पार्थिव शरीर काठमाडौंबाट जब हेलिकप्टरमार्फत गृहस्थान आइपुग्यो, सिङ्गो देवानगञ्ज गाउँपालिका छाँगाबाट खसे जस्तै भयो ।

​सेतो कपडामा बेरिएको निष्प्राण शरीर हेलिकप्टरबाट बाहिर निकालिँदा त्यहाँ उपस्थित हजारौँ मानिसका आँखाबाट आँसुका धारा थामिन सकेनन्। आमाले छाती पिट्दै गरेको चित्कार र परिवारका सदस्यहरूको कहालीलाग्दो रुवाबासीले वरपरको वातावरणलाई थप मर्माहत बनायो। बुढेसकालको सहारा बन्ने र घरमा खुसी भित्र्याउने सपना बोकेका होनहार युवाको यो अकल्पनीय र दर्दनाक अन्त्यले सबैको मुटु छायो। रविन्द्रको विवाहसमेत भएको थिएन; जीवनका रङ्गीन सपनाहरू बुन्ने र भविष्यको बाटो तय गर्ने उमेरमा उनले यसरी संसार छाड्नुपर्दा सिङ्गो समाज स्तब्ध छ।

​गाउँपालिकाका बाटो र चोकहरूमा हजारौँ स्थानीयवासी, आफन्त र शुभेच्छुकहरूको विशाल जनसागर उपस्थित थियो। कसैका हातमा श्रद्धाञ्जलीका फूल थिए भने कसैका आँखामा साउनको झरीजस्तै आँसु। सडकका दायाँ-बायाँ पंक्तिबद्ध भएर उभिएका गाउँलेहरू भक्कानिँदै उनको योगदान र बलिदानको स्मरण गरिरहेका थिए। आफ्नै आँखाअगाडि हुर्किएको एउटा उज्यालो मुहारलाई यसरी सधैँका लागि बिदाइ गर्नुपर्दा कसैको पनि ओठ खुलेन, केवल आँसुले नै सबै कुरा बोल्यो।
​
अन्ततः शोकाकुल वातावरण र हजारौँ रसाएका आँखाहरूको साक्षी राख्दै राजकीय तथा सामाजिक सम्मानका बीच रविन्द्र मेहताको पार्थिव शरीरलाई पञ्चतत्वमा विलीन गरियो। चिताबाट उठ्ने धूवाँसँगै देवानगञ्ज गाउँपालिका र आसपासको क्षेत्र गहिरो शोकमा डुबेको छ। आज देवानगञ्जको प्रत्येक घरको चुल्हो निभेको छ, र हरेक आँगनमा एउटै मात्र पीडा गुञ्जिरहेको छ— हाम्रो आफ्नै रङ्गीन सपना बोकेको एउटा उज्यालो नक्षत्र सदाका लागि अस्तायो।